– Mun beroštan diekkár áššiin mat gullet nuoraide - sámi nuoraide - ja de sámegiella lea okta dain; háliidan ahte buohkat galget oahppat sámegiela, lohká Celine Boyne Lamo, guhte ieš lea ođđa evttohassan sámediggeválggaide Ávjovári válgabiires.
Sullii 60 proseantta listaolbmuin, leat nu go Boyne Lamo, ođđa evttohasat iežaset listtuin ovddit válggaid ektui.
14 bellodaga ja 60 listtu
Otne dievai dieđihanáigemearri listtuide mat áigot sámedikkeválggain leat mielde.
– Dál lea boahtán sisa badjelaš 50 iešguđege listtu iešguđege bires, ja de lea 14:s iešguđege bellodaga, mat leat ceggen listtuid válgabiriin, čilgii Sámedikki ráđđeaddi Tove Anti, dalá maŋŋá go dieđihanáigemearri lei dievvan.
Veaigge beallai bearjadaga lei dihtosis ahte go rehkenastá buot listtuid, buot válgabiriin, de leat oktiibuot 63 listtu dieđihuvvon sámediggeválggaide.
Dál dárkkista Sámediggi ahte listtut leat lobálačča, ja listtut galget loahpalaččat dohkkehuvvot ovdal geassemánu vuosttaš beaivvi.
Šiella guđa válgabires
Vibeke Larsen lea 2005 rájes ovddastan Bargiidbellodaga Sámedikkis. Ođđajages geassádii son bargiidbellodagas ja ásahii son Šiella bellodaga.
Foto: Amund Trellevik/NRKDálá sámediggepresideanta, guhte ođđajagis geassádii bargiidbellodagas, lea ásahan válgalisttu Šiella bellodaga namas guđa válgabires.
Dušše máttasámis ii leat Šiella nákcen cegget listtu sámediggeválggaide. Nuortaguovllu válgabires leat Sámedemokrahtat ja Šiella ásahan oktasaš listtu.
Árja ge searvá sámediggeválggaide guđa válgabires.
Ovddádusbellodat buot válgabiriin
Ovddádusbellodat searvá sámediggeválggaide buot válgabiriin.
Bargiidbellodat, Guovddášbellodat, Olgešbellodat ja Norgga Sámiid Riikasearvi maid leat ráhkadan válgalisttuid buot válgabiriin.
