Colluseum-kino oaivegávpogis lei spagga dievva go Nils Gaup filbma "Birkebeinerne" čájehuvvui bearjadateahkeda. Maiddái eará kinoin Norggas čájehuvvui filbma.
Filbmadahkki duhtavaš
Birkebeinerne filbmadahki, Nils Gaup, gii čuovui filmma Colluseum kinos oaivegávpogis lei duhtavaš ja su mielas orro olbmot liikomin dasa maid oidne. Gaup lei filbmadahkki maid Ofelaš-filmmas fargga 30 jagi áigi, ja dat movttiidahtii su ráhkadit eanet filmmaid.
Buorre leahttu ja olu garra dáhpáhusat
Sámi Ofelaš-filmmá váldoneavttár Mikkel Gaup mielas lei filbma buorre, das ledje garra
dáhpáhusat ja olu leahttu. Gaup rámpo Birkebeinerne-filmma filbmadahkki ja neavttáriid.
Mo du mielas lea filbma Ofelaš-filmma ektui?
– Na, olu duottar gal lei ja čuđit eai gal lean, muhto olbmot, geat ledje Håkon Håkonsen maŋis. Doppe ii lean eallu muhto heasttat. Muhtun láhkái lei seamma lágan muitalus, muhto dattetge ii seamma.
Jurddašit go Ofelaš-filmma go oidnet dán filmma?
– Aa, Ofelašfilbma gal lea dahkkon nu áigá. Lea buorre go Niillas muitala dákkár historjja dáččaid birra. Jáhkán dát filbma lea buorre skuvlamánáide maiddái historjjá dáfus.
Neavttárin olu hástalusat
Ovtta váldoneavttára Jakob Oftebro mielas ledje olu hástalusat filmma ráhkadettiin, nugo doarrumat ja galbma dálkkit. Dán ferte gierdat go galgá leat Birkebeinerin filmmas, dasa lassin lea sus sámi duogáš maid, muitala Oftebro.
Nuppi váldoneavttára Kristoffer Hivju mielas lei váttis bissut sabehiid nalde čierastettiin, dasa lassin lei erenoamaš gádjut 11-mánnosaš máná. Dál jáhkká Hivju ahte olbmot ohppet eambbo go Birkebeineriid birra go dušše Birkebeiner-čuoigamiid ja sihkkelastin- gilvvuid go oidnet dán filmma, ja ahte beroštupmi lassána.
Gula Nils Gaup, Jakob Oftebro ja Kristoffer Hivju:
Gula Ofelaš-filmma váldoneavttára Mikkel Gaup: