Olmmošvuoigatvuođa direktevrra sávvá eisseváldit ohppet Fovse-áššis
Arendalvahkus lei Norgga olmmošvuoigatvuođaásahus direktevra, Adele Matheson Mestad mielde ságastallamis bieggafámu birra, ja mo dat čuohcá boazodollui.
Son sávvá ahte eiseválddit váldet oahpu Fosen-áššis vai Norga ii gartta dakkár dillái mas leat rihkkon olmmošvuoigatvuođaid, jus huksejit bieggafápmorusttega boastu láhkai.
– Mii han leat maid evttohan dárkkisteami Fovse-áššis, geassin dihtii oahppočuoggáid ja váruhit ahte nu ii dáhpáhuva šat. Dát lea maid oassi olmmošvuoigatvuođalaš divvungeatnegasvuođas mii sis lea.
– Mii sávvat ahte dan sáhttá doaimmahit, nu ahte dat máhttu dagaha ahte eisseváldit eai leat sullosaš dilis moatti jagi geahčen.
– Maid sáhttá stáhta ja NČE dahkat vai eai rihko olmmošvuoigatvuođaid fas bieggafápmoáššis?
– Vuosttaš lea bures olmmošvuoigatvuođa guorahallat bieggarusttetáššiin, vai lea dihtomielalašvuohta gokko lea rádji, ja makkár sisabahkkemiid ii sáhte suovvat. Nubbi lea dahkat buori árvvoštallamiid ollislaš deattu ektui, ja oaidnit sisabahkkemiid eará sisabahkkemiid oktavuođas.
Loahpas čujuha Matheson Mestad ahte ferte ráđđádallat, ja sihkkarastit ahte sii geaidda bieggafápmu guoská, maiddái guldaluvvojit.
