Sámi balddonasfilbma boađi-boađi

Birut ja ráimmahallan lea fáddán ovtta dain filmmain maid dál leat báddegoahtime Guovdageainnus.

Geafivuohta doalvu áhpehis nissona girkogárdái gos suoláda silbbaid muhtin sámi áhku hávddis.

Dan ii lean goassege galgat bargat.

Son ráimmahallá, ja nu jorgaluvvo su eallin olles helvehin.

Duohta fearán

Filmma muitalus vuolgá duohta fearánis, mii galgá leat dáhpáhuvvan sullii čuođi jagi áigi Ruoŧa beal Sámis, muitala buvttadeaddji Per-Josef Idivuoma.

Okta neavttár gal lei vissa suorganan go logai «Unborn Biru» mánusa vuosttaš geardde.

– Son dajai «gal lei oalle issoras filbma, duosttan go son dása gal álgit», bohkosa Idivuoma NRK Sámi «Veaigesáddagis».

• GULDAL Veaigesáddaga: Ohcamin statisttaid balddonasfilbmii.

Árktalaš ovttasbargu

– «Unborn Biru» lea oaivvilduvvon álgoálbmotnuoraide ja ollesolbmuide, ja vuolggahuvvui Arctic Chills ovttasbargo-prošeavttas, muitala Idivuoma.

Arctic Chills lea Internašunála Sámi Filbmainstituhta (ISFI) ovttasbargoprošeakta eará árktalaš álgoálbmot filbmadahkkiiguin.

Balddonasat leat bivnnuhat

– Hui suohtas go viimmat leat ollen nu guhkás ahte sáhttet báddegoahtit dáid filmmaid, illuda ISFI direktevra Anne Lajla Utsi.

– Jus geahččá maid eará álgoálbmot filbmadahkkit leat ráhkadan maŋemus áiggiid, de sáhttá lohkat ahte balddonasfilmmat orrot bivnnuhat, muitala Utsi.

10 minuktasaš filbma = 2 mill ruvnno

Per Josef Idivuoma muitala iežaset ožžon measta 2 miljovnna ruvnno ruhtadoarjaga iežaset logi minuktasaš filbmii.

– Filbma lea hui divrras. Guhkes filmmaide dárbbašuvvo ges sullii 20 miljovnna ruvnno, muitala ISFI direktevra Anne Lajla Utsi.

Son muittuha lihkká ahte filbma orro hui divrras, muhto dat han lea hui ollu olbmuide bargosadji.

Čuvges boahtteáigi

ISFI direktevra oaidná sámi filbmabargiin hui čuvges boahtteáiggi.

Son muitala ollu stuora buvttadanbargguid vuordagis, ja namuha muhtumiid:

• Ole Giæver «La elva leve»
• Elle Sofe Sara - Luohtemusikála «Árru»
• Sara Margrethe Oskal - Guhkes filbma
• ISFI/YLE pláneme stuora TV-ráiddu
• NRK Sápmi TV-ráidu

Utsi lohká filbmabargguid addit ollu bargosajiid. Ii dušše filbmadahkkiide, muhto maiddai báikkálaš olbmuide.

Buvttadeaddji Idivuoma duođašta ahte lea bargu oallugiidda go nu ollu olbmot čoagganit báddemiidda.

– Juohkehažžii galgá ovdamearkka dihte rievttes biebmu njuni vuollái, boagusta son ja lohpida ahte «Unborn Biru» galgá leat válmmas ovdal go čuoika girdila.

LOGA MAID: Regissør laga film om Alta-aksjonen – blei same