Ari Behn 16-jahkásaš nieida Maud Angelica Behn lei sárgon gova, maid lei áigon iežas áhččái addit.
Nu ii šaddan.
– Dán tevnnega áigon dutnje addit juovlaskeaŋkan. Sárggodettiin gova jurddašin man sakka mon du ráhkistan, ja man sakka illudan oaidnit du ámadaju go rabat mu skeaŋkka, logai Maud Angelica Behn, čieru čalmmiid.
- Les artikkelen på norsk: Datteren Maud Angelica: Du var helten min, pappa
Go hávdádus álggii Oslo duopmogirkus, bijai son gova áhčis gistu ala. Garra morrašis doalai son muitosártni iežas áhččái.
Son ávžžuhii buohkaid geat rahčet psyhkalaččat ohcat veahki.
– Jos jearat veahki, de čájehat ná givrodaga. Servvodagas leat ge dievva fágačeahpit, gergosat veahkehit buohkaid geat dárbbašit veahki, logai son.
Son lohká morraša leat garas ja dovddahii maid stuorra ráhkesvuođa iežas áhččái.
– Don ledjet mu ovdagovva ja sáŋgár, áhčči, logai Maud Angelica Behn.
Ari Behn eatni ja áhčči maid lossa morrašiin muittašeigga iežaska bártni. Girkus oidnui bures ahte sártnit njuorasmahtte ollugiid.
Gatnjalat golge
Stáhtaministtar Erna Solberg ja njeallje stáhtaráđi maid oassálastet hávdádusas.
Solberg lei sakka njuorrasan go gulai Behn lagamuš bearraša muitosártniid.
Gatnjalat dušše golge go stáhtaministtar dalá maŋŋá hávdádeami searvvai NRK TV sáddaga jearahallamii.
Erenoamáš garra dovdduid bovttii Behn 16-jahkásaš nieidda sárdni.
– Gal dát čuohcá gitta váimmu siskkimužžii. Dat vuhtto ahte son lea bajásšaddan ruovttus gos mánáid ja vánhemiid gaskka lea garra ráhkesvuohta, lohká Solberg.
Ruoŧa gonagasbearraša ovddastii prinsa Daniel.
Sámediggi ii lean sádden ovttage almmolaš ovddasteaddji Ari Behn hávdádussii.
- Loga maid:
Doarjjui lagaš skihpára
Beakkán sámi govvideaddji ja Ari Behn lagaš ustit, Per Heimly, bođi čáhppes beaivvášglásain Behn hávdádussii.
Heimly lei okta dain guhte maŋimuš jagiid lea geahččalan doarjut ja movttiidahttit Behn, go Behn ražai dearvvašvuođain. Nu čilge Heimly NRK TV-prográmmas, mii čájehuvvo bearjadat eahkeda.
Behn lea ieš maid rahpasit dovddahan ahte sus dáidá leat sámi duogáš. Njukčamánus 2015 lei son Heimly mielde Finnmárkkus. Soai finaiga duoddaris govvideamen, ja maŋŋá lei govvačájáhus Sámi viesus Oslos.
- Loga dárogillii maid:
Buohkat eai čáhkan girkui
Oslo duopmogirkui čáhket sullii 800 olbmo. Ollugat dain geat ledje boahtán hávdádeapmái čužžo máŋga tiimmu olggobealde girku, ovdalgo besse sisa.
Vaikko nie stuorra olmmošálbmot lei čuččodeamen olgun, de lei áibbas jaskat. Dušše trihkat gullojedje go ain vudje duopmogirku meattá.
Ollugat eai beassan sisa, vaikko ledje olles iđitbotta vuordán olggobealde girku.
Sámediggi ii lean sádden ovttage ovddasteaddji Ari Behn hávdádussii.
Jagi 2002 náitalii Behn Norgga prinseassain Märtha Louiseain. Jagi 2016 soai earráneigga. Sutnos leat golbma máná, Maud Angelica, Emma Tallulah ja Leah Isadora Behn
Girječálli ja dáiddár, Ari Behn vádjolii vuosttaš juovlabeaivve.