Turistakárttas maid Sámi Radio lea geahčadan, gávndojedje moatti minuvttas máŋgalogi báikenama Finnmárkkus mat leat čállon boastut.
Daid sámegiel báikenamain leat eanemus čállinmeattáhusat.
- Dát ii leat dohkálaš, lohká Kárášjoga gieldda giellabargi, Ánne Máret Eira.
- Bilida giela
- Olbmot soitet jurddašit nie dat galgá go almmolaččat leat čállon boastut. Nu sáhttá dat billistit dan giela dakkáriin geat eai leat nu čeahpit vuos čállit.
Sii dieđusge čuovvolit dan mii almmolaš báhpáriin čuožžu, ja nu sáhttá boasttuvuohta viidánit, lohká Eira.
-Bázahusat boares čállingielas
Kártta, man namma lea Opplev Finnmark, fidne nuvttá diehtojuohkinfitnodagain.
Go Eira oaidná kartta, de árvvoštalla ahte ollu veadjá leat boares čállinvuogi mielde čállon, ee. danne go olu sajin gokko -t- livčče galgan loahpas, de lea -k- biddjon, nugo - gasadak- ja -javrek-.
-Johka- čállet ain -jokka-
Jokka ges lea biddjon johka sadjái. Diftoŋŋaid sajis gis lea dávjá dárogiel bustavat nugo dárogiel -æ-. Omd. lea Leavdnjajohka čállon Lævnjasjokka.
Eará namat maid leat aibbas boastut čállán lea nugo Vuolledállu Mázes, mii lea šaddan Vuolledalen. Náššajohka lea gis čallon Naaaajokka njeljjin a:in, ja Gievdneguoika gis Gjevdnejegoikka.
- Eai vuorut sámegiela
Kárášjoga gieldda giellabargi Ánne Máret Eira lohká ahte dál livčče áigi sámegiela vuoruhišgoahtit.
- Dat oidno ahte eai vuorut divvut ja eai ge vuorut sámegiela nu mo galggašedje ja nu mo leat geatnegahtton sámegiellalága mielde, cuiggoda Eira.
-Cappelen Kartverk lea gáldu
Imap Norge AS dat lea deaddilan ja ráhkadan dán turistakártta daid dieđuid vuođul maid leat ožžon Cappelens kartverkas.
Sámi Radio ii leat fidnen ovttage Cappelenas kommenteret dáid boasttuvuođaid.
- Berre njulgegoahtit boasttuvuođaid
Eira mielas lea hui čielggas mii berre dahkkot.
- Dál fertejit álgit divvut namaid ja ođđasit bidjat daid sisa, rivttes čállinvuogi mielde. Dán bargui gal sihkkarit ožžot veahki Sámedikki giellalávdegottis, loahpaha Eira.
