NRK Meny
Normal

Olli virgáduvvon direktevran

RiddoDuottarMuseaid stivra lea virgádan kárášjohkalačča Anne May Olli museadirektevran mearreáiggevirgái viđa jahkái.

Anne May Olli

RiddoDuottarMuseaid ođđa direktevra lea Anne May Olli.

Foto: Maria Therese Oskal / NRK Sápmi

Son duođaštii cuoŋománu 17. beaivvi ahte álgá virgái miessemánu 26. beaivvi 2015.

RiddoDuottarMuseaid stivrrajođiheaddji Martin Rimpi lea duđavaš go Anne May Olli álgá virgái.

– RiddoDuottarMuseat leat nuppástuhttimin ja ovddideamin doaimmaideaset ja dát dahká virggi gelddolažžan. Mun jáhkán Olli bures nagodit hálddašit dán barggu ja seammás váikkuhit dasa ahte bargiin lea ain oadjebas bargobiras, cealká Rimpi preassadieđáhusastis.

– Stuorra hástalusat

Anne May Olli lea 39 jagi boaris, eatni guovtti gándii ja son lea náitalan Tor Mikkel Eirain.

Ollis lea masteroahppu konserveremis, - nubbi dan guoktásis, Finnmárkku dávvervuorkáid bargiin geain lea dát oahppu. Oahpus son čađahii Oslo Universitehtas.

Konserveremii gullá dávvirseailluheapmi ja vurkkodeapmi. Masterbarggustis son dutkai sámi museadávviriin mirkkuid ja daid váikkuhusaid birra. Dát lea áidna dutkkus mii lea čađahuvvon dán fáttás olles Norggas.

(Ášši joatkašuvvá gova vuolábealde)

Anne May Olli

Anne May Olli isidiinnis Tor Mikkel Eirain.

Foto: Jaana Niittyvuopio / NRK Sápmi

Anne May Olli vástida ná gažaldahkii makkár jurdagat ja vuordámušat sus leat direktevrrabarggu hárrái:

– Dat mii álkit boahtá, maid álkit jávká, mun dieđán.

– Stuorra hástalusat gal bohtet barggu oktavuođas ja maid ferte čoavdit, son deattuha.

Son lohká viidáset ahte musea lea dakkár ásahus mii gaskkusta ja vurkkoda dološáiggi boahtteáigái, dálá máhtuin ja daid resurššain mat leat.

– Min ovddasvástádus lea máttuideamet árbbi áimmahuššat maŋisboahttiidasamet.

Oahpis RDM:ii

Anne May lea oahpis RDM:ii go son lea guhká bargan Sámiid Vuorká-Dávviriin, gitta dan áigodaga rájes ovdal museaid ovttastahtima 2004 rájes - 2006 rádjai. Son jotkkii RiddoDuottarMuseain konserváhtorin 2006 rájes, gitta 2012 rádjai.

Olli lea olu bargan Bååstede-prošeavttain - eamiálbmot dávviriid, erenoamážit sámi dávviriid máhcahit Sápmái, ja Árbediehto-prošeavtta oktavuođas lea son bargan áššiin mat gusket árbevirolaš dávvirvurkkodeapmái.

Anne May lea boanda, sihke mielke- ja biergobuhtadeamis, isidiinnis lea maid sudnos boazodoallu ja bohccobiergočuohpahat- ja buhtadanfitnodat.

Sus leat maid máŋga eará doaimma, - nu go politihkkárin Kárášjoga Bargiidbellodagas gielddastivrras, stivrrajođiheaddjin ADHD-Norge Kárášjoga báikkálašsearvvis, nubbinjođiheaddjin Kárášjoga boanddaidsearvvis ja lea «Økt verdiskapning på mat fra arktisk landbruk» stivrenjoavkku lahttun.