NRK Meny

Olbmot riŋgegoahtán sutnje

Kari Balto muitala olbmuid leat riŋgegoahtán sutnje maŋŋilgo tv:s oidne su rohkadallamin meahccis. Ná ii lean son jurddašange sáhttit. Su rohkoslistta lea šaddan danne juo oalle guhkkin dál.

Kari Kørner Balto
Foto: Anne Olli / NRK

Artikkelen er flere år gammel.

Čakčamánu álggus dat sáddii NRK 1 prográmma Åpen Himmel, dán prográmma lei NRK Sámi Radio ráhkadan. Ja prográmma fáddán lei vuoiŋŋalašvuohta ja buorideapmi.

Kari káhtedrála meahccis

Prográmmas muitalii Kari Balto iežas rohkadallanbáikkis. Son lea áinnat gávdnan alcces vuogasis báikki meahccis maid gohčoda iežas katedrálan. Doppe son muitalii iežas rohkadallan bártnis ovddas, ja bárdni ges duođaštii ahte son dearvvasmuvai. Dán prográmma diehtalasat gehčče ollugat, go das rájes leat olbmot riŋgegoahtán Kari Baltoi ja bivdán su rohkadallat iežaset ovddas.

Kari Balto iežas rohkosbáikkis

Kari Balto iežas rohkosbáikkis

Foto: Anne Olli


Ii lean vuordán olbmuid sutnje dorvvastit

Kari Balto ii loga iežas ii jurdilange dan ahte olbmot dal álget sutnje riŋget ja bivdit su rohkadallat sin ovddas.Muhto ollugat leat riŋgen ja bivdán su rohkadallet sin ovddas.

Olbmot riŋgejit iešguđetge guovlluin Norggas, ja son gal diehtalasat váldá sin jearaldagaid duođas.

Navdet su leat buorideaddjin

Muhtimat gal jerret sus ahte lea go son buorideaddji/ healár, muhto de gal ferte son muitalit ahte son lea dábálaš eadni gii rohkadallá mánáid ja mánáidmánáidis ovddas. Son rohkadallá gal maid earáid ovddas, geat bivdet su váldit iežaset mielde rohkosii.

Diehtá Ipmeláhčči gulla rohkosa

Son diehtá ahte Ipmel Áhčči gullá buohkaid, danne son rohkadallá. Muhtimat leat gal lohkan sutnje ahte mo bat son sáhttá vuordit álo veahkki Ipmilis, muhto dasa son vástida ahte Ipmel Áhčči gulla buohkaid. Rohkadallamiin biddjá son buot áššiid Ipmel Áhčči háldui, ná son luvve iežas váivviin ja nie son maid luvve earáid morrašiin, bákčasiin ja váivviin.

Kari Balto iežas rohkosbáikkis

Kari Balto iežas káhtedrálas

Foto: Anne Olli

Nama ii dárbbaš diehtit, go dan diehtá Ipmil Áhčči

Ná leat ge čoggon ollu olbmot su rohkoslisttii. Iežas lohká muitalan olbmuide ahte ii son dárbbaš diehtit sin namaid, danne go sin namaid dat gal Ipmel Áhčči ieš diehtá, son báicce jearrá gos sii ásset.

Go lea listta de muitá sin váldit mielde go rohkadallá, son muitá manne sii riŋgejedje. Ja eatnašiin sis lea lossadis eallindilli. Buot dáid áššiid lokte son rohkosiin Ipmel Áhčči háldui. Seammás lea son dahkan dan maid dát olbmot leat su bivdán dahkat. Dalle diehtá son ahte sin áššit leat Ipmel Áhčči ovdii biddjon.

Gállá muohtagisge iežas káhtedrálii


Son finada dálge dálvit iežas katedrálas Njárgajávrris. Gieskat go son finai doppe, de lei sus hui ártegis vásáhus, dat lei dat ahte su rohkadallanbáikái lei vealuhuvvon soahki. Dát soahki lei sodjan nu ahte šattai dego áltár-riekkisin sutnje. Dán ala son luittii iežas roahkkalas gieđaid ja rohkadalai

Dies son rohkadallá. Ja rohkosbottu maŋŋil dovdá son ráfi, go dalle son diehtá ahte buot áššit leat de biddjon Ipmel Áhčči háldui, eai dat leat šat su alde, go dáid lea son lokten Ipmila ovdii rohkosiin.