Ealljáris luossabivdi han hommá vuokkaiguin dalle go bivdolohpi ii leat, dannego bivdolobi áiggi han ii astta eará go bivdit, muitala Ándde Niilas.
Vuojaha vuokkaid
– Mun láven giđđat juo go suttit rahpasišgohtet, mannat ođđa ráhkaduvvon vuokkaid
vuojahit, geahččaladdat mo de láhttedit čázis. Dalle oainnán mo ferte divustit vai luossa fuollá. Bearráigeahčču dat ii vuolgge gal šat mu vuortnuhit duššiid, go dat dovdet mu ja dihtet mun in leat oaggumin – lean dušše vuoggabarggus, čaimmiha Ánde Niilas.
Son hommá eanaš "oston muorravuokkaiguin" maidda lonuha buoret "gáibbevuloža", mii doalvu vuokka čiekŋalabbui.
Luosat leat eanaš jogabotni lagabus, eaige čázeoaivvis, muitala Ánde Niilas, gii ii eisege oru 80 jagi deavdán.
Son dat han nu geahppadit ain gorgŋesta Deatnogáttis geidnui, Vuollegeavgŋá vulobealde,
vaikke lea alla vuostálat. Muhto ii mieđit iežas leat šat nu vallin, ja váidala julggiidis geahnohuvvagoahtán. – Lihkkobihtás nagodin duhpáha heaitit čieža jagi dassái, muđui ii leat buorre dadjat mo livčče mannan, láhttesta son giitevaččat ja buriin movttain.
Oaggunlohpi gaskavahku 20.b.
Gaskavahku čuovganeapmái dat álgá easkka oaggunlohpi Deanu čázádagas – álggos vuos báikki olbmuide. Dassážii lea Ánde Niilas geargan vuojaheamis buot vuokkaid.
Go mu miela mielde vudjet dat vuokkat, de jáhkán luosa maid liikot daidda, dadjá Ánde Niilas.
Geassemánu 1. beaivvi rájes besset turisttat maid bivdigoahtit, dieđiha