NRK Meny
Normal

Searvvašii áinnas mohtačájáhussii

Máttasápmelaš mohtabivttashábmejeaddji mielas lea buorre jurdda lágidit oktasaš mohtačájáhusa, mas čeahpimus eamiálbmot mohtahábmejeaddjit leat mielde.

Laila Wilks ja Hanne Lena Wilks
Foto: Gard Brox Jensen / NRK

Laila Wilks ja su oabbá Hanne Lena leaba čeahpimus sámi mohtabivttashábmejeaddjiid gaskkas. Juohke jagi soai doallaba bivttasčájáhusaid Mátta-Sámis ja Laila Wilks lohká iežas áinnas searvat oktasaš eamiálbmot mohtadoaluide.

 Gelddolaš jurdda

 

 

Sámi mohtačájáhus
Foto: Gard Brox Jensen / NRK

- Dát orro leamen issoras miellagiddevaš jurdda. Mun in leat gal goassige ovdal gullan, ahte livčče lágiduvvon dakkár doalut gos eamiálbmot mohtobivttashábmejeaddjit sáhttet deaivvadit ja oaidnit maid earát barget. Mii eat oppanassiige dieđe nuppiideamet birra maidige, oaivvilda Wilks.

- Dušše dat ahte čatnat oktavuođaid eará bivttashábmejeaddjiide ja deaivvadit nuppiideametguin attášii ođđa vejolašvuođaid. Olmmoš han hálidivččii earáide čájehit maid máhttá ja njulgestaga oidnot. Dáinna lágiin han sáhtášii maid eambbo oidnot máilmmis ja sáhttá vaikkoba bargagoahtit ovttas earáiguin, lohká Laila Wilks.

Unna ealáhusaš

 USAs ja Kanadas lea eamiálbmogiid bivttashábmen stuorra industriija ja dovddumus bivttashábmejeaddjit diinejit maid stuorra ruđa, muhto nu ii leat eisege Sámis.

- Ii oktage daid bivttashábmejeaddjiin geaid mun dovddan jođit makkárge stuorraindustriija. Sámi bivttashábmejeaddjit barget buot bargguid ieža - álggus gitta lohppii. Buot sárgomis, hábmemii gitta goarrumii lea dakkár bargu maid sámi bivttashábmejeaddjit ieža dahket, čilge Wilks.

Wilks almmatge navdá ahte bivttashábmen Sámisge áiggi mielde sáhtášii šaddat industriijan, nu mo ovdamearkka dihtii USAs ja Kandas lea. Dan son goit sávašii.

Gula Laila Wilks jearahallama