NRK Meny
Normal

Hálida sámiiguin oktavuođa

Kree-Metis mohtabivttashábmejeaddji Angela DeMontigny jáhkká eamiálbmot bivttashábmejeaddjiid joksat stuorát márkaniid, jus ovttasráđiid fállet buktagiiddiset.

Angela DeMontigny

Angela DeMontigny lea okta njunuš eamiálbmot mohtabivttashábmejeaddjiin Kanadas. Dat mii su vuosttažettiin lea dahkan dovddusin leat su gieđain-njuhttojuvvon (hand-painted) motiivvat biktasiin. Son lea earret eará doallan mohtačájáhusaid Davvi-Ámerihkás, Vuolleeatnamiin, Stuorrabritannias ja Italiijas.

Stuorra hástalusat

 

Angela DeMontigny plakáhta

DeMontigny ja Bronitsky and Associates fitnodat Ámerihkás leat dál plánemin stuorra eamiálbmot mohtačájáhusa, gosa sámi mohtabivttashábmejeaddjit maid bovdejuvvojit.

- Jáhkán mis leat stuorra hástalusat buot riikkain gos eamiálbmogat ásset. Bivttashábmejeaddjiide lea mávssolaš oidnot maiddái eará sajiin go doppe gos mii ieža ássat. Seammás lea vuogas máilbmái čájehit, ahte mii leat vitmadat ja ahte mii nagadat geavahit kultuvrramet vuođđun dasa ahte hutkat juoga mii lea árvvolaš, čilge Angela DeMontigny.

Joksat stuorát márkaniid

 

Angela DeMontigny biktasat

- Jus dolašii dákkár oktasaš mohtačájáhusa gos čeahpemus eamiálbmot bivttashábmejeaddjit leat čoagganan, de jovssašii eahpitkeahttá stuorát márkaniid. Jáhkán ahte máilmmis lea stuorra beroštupmi dasa maid mii dahkat, vaikko máilmmi ii vel dieđe nu olu eamiálbmot mohtaindustriija birra dahje dat mii dahkko eamiálbmot mohtamáilmmis, lohká DeMontigny.

 Dávjá televišuvnnas

 

Angela DeMontigny biktasat

Angela lea dovddus olmmoš Kanadas ja oidno dávjá televišuvnnas. Son lea máŋgii leamaš mielde guoimmuheamen go eamiálbmot gudnebálkkašumit juhkkojit jahkásaččat. Muđui láve mielde našonála TV-šovvain ja su birra lea maid ráhkaduvvon sierra prográmma Fashion TVs.

Jus áiggošit oastit DeMontigny biktasiid, de fertet gal bures burgit iežat burssas. Su hálbbimus biktasat mákset sullii 800 dollara ja divraseammos biktasat sullii 5000 dollara.

Gula Angela DeMontigny jearahallama