NRK Meny
Normal

Ohcet láhppon dievddu Deanus

Politiijat leat álggahan ohcanakšuvnna go badjel 30-jahkásaš dievddu lea láhppon.

Leteaksjon i Tana

Buollinčáskadanbiila ja eará gádjunbiila leat ohcamen dievddu. Siviilasuodjalusa- ja Ruksesruossaolbmot ges vázzet biilaluoddaráigge.

Foto: Tor Emil Schanche / NRK

Dievdu lea maŋemus oidnon go guđii viesu Álletnjárggas, Deanu gielddas, sotnabeaivve diibmu 05.00 áigge.

– Mii eat oza nu viiddis guovllus vuos, muhto Deanu šalddis Álletnjárgga guvlui. Sihke Siviilasuodjalusa- ja Rukses Ruossaolbmot leat ohcamen su, dieđiha operašuvdnajođiheaddji Jan Olav Schjølberg Finnmárkku politiijaguovllus NRKii.

Cavgil politiijaide

Politiijat háliidit cavgilemiid jus leat oaidnán dievddu vázzimen Fylkkageainnu 895as mannan sotnabeaivve diibmu 0500 ja 0900 Buolbmát, Skiippagurra ja Deanu buohta.

Dievddus sáhttá leat badjelasas čuvges ruoná jáhkka, mas čuožžu «Bring».

Politiijat ávžžuhit maid bartaeaiggádiid fitnat iskamen iežaset opmodaga, jus dievdu lea geahččalan suoji gávdnát.

Jus dus leat dieđut, čuojat politiijaide: 02 800 / 78 97 20 00.

Dálki

NRK Sámi reporttar Tor-Emil Schanche dieđiha ahte guovllus šlahttá ja ain leat arveoavttit.

– Lea njalkkas ja dálkkas, lasiha son.