– Dál ii leat oktage dán doaimmas, danne ohcat Kárášjogas olbmo dán bargui, lohká Meteorologalaš Instituhta ráđđeaddi Ted Torfoss.
Gieskat finai Meteorologalaš Instituhta dálkedieđiheaddji John Smith RiddoDuottar museas Kárášjogas muitaleamen Kárášjoga dálkedieđihan stášuvnnas mii lea doaibman 140 jagi. Seammás muitalii Meteorologalaš Instituhta doaibman 150 jagi.
Ja buollašeamos beaivi mii goassige lea dieđihuvvon lei Kárášjogas, 130 jagi áigi.
Dán oktavuođas lea dál RiddoDuottar museas Kárášjogas čájáhus mii muitala das.
140 jagi doaibma ii leat šat dál ollislaš
Automáhtalaš dálkedieđihanstášuvdna márkanjárggas Kárášjogas. Lassin dása galggašii vel olmmoš gii dieđiha dálkkis maid oaidna ja dovdá.
Foto: Ole Jorgen Ostby N-3630 RodbergMeteorologalaš Instituhta ráđđeaddi Ted Torfoss ii loga doaimma Kárášjogas dál leat ollislaš danne go dál bohtet dušše dieđut dan automáhtalaš stašuvnnaš.
Sii dárbbasivčče maid maid juohke beaivvi golbmii dieđuid das mo dálki lea, leago obbadálki, balvái, arvi, muohtti, beaivvadat dahje jalahas.
Ohcet bargi gii doaimmahivččii dálkedieđuid
Meteorologalaš Instituhtta ohcá bargi gii golbmii beaivái dieđihivččii sidjiide dálkkis Kárášjogas. Dieđuid galgá sáddet čieža áigge iđđedis, ovtta áigge beaivit ja čieža áigge fas eahkedis. Dalle galgá mannat olggos ja iskkat dálkki, geahččat mo balvvat leat, lea go biegga j.n.a.
Olmmoš gii dán doaimma váldá badjelasas, son ferte leat Kárášjogas juohke beaivve ja dieđihit dálkki.
Ii son dattetge dárbbas čohkkát ruovttus, muhto dálke-dieđiheaddji ii galggá leat guhkelis go golbma kilomehtera eret dan automáhtalaš dieđihanstašuvnnas.
Dat mearkkaša ahte olmmoš ii darbbaš leat ruovttus go dieđiha, son sáhttá leat eará barggus, muhto finada olgun daid áiggiid go galgá dieđihit Meteorologalaš Instituhtti dálkkis.
