Ohcejoga nuorat moraštit

Mannan váhku dáhpáhus mas 17 jahkásaš skuvlaoahppi čuggejuvvui jámas skuvllas Ohcejogas, lea bidjan buot gieldda ássiid stuorra morrašii. Erenoamaš dehálaš lea átnit fuolas nuoraid dál, dadjá báhppa.

Flagging på halvstang i Utsjok
Foto: Eljas Niskanen / YLE Sápmi

– Mánáin ja nuorain leat olu gažaldagat, ja dál livčče sávahahtti ahte buohkain livčče áigi bisánit ja guldalit sin. Buohkat dárbbašit doarjaga, ja dat orro nu ahte sámi servvodat doarju maiddái min nuoraid, nu dadjá báhppa Erva Niityvuopio, gii lea sámi áššiid čálli Oulu bismmagottis.

Tente lys

Ohcejogas ledje cáhkkehan čuovggaid.

Foto: Eljas Niskanen / YLE Sápmi

Mannan bearjadaga rájes leamaš sus bargun erenoamažit mánáid ja nuoraid dili dusttet maŋŋel go 17 jahkásaš skuvlaoahppi čuggehállui ja jámii Ohcejoga sámelogáhagas. Nuorain lea dál lossa dilli, dadjá son.

– Dát lea aitto dáhpáhuvvan, dat lea váttis ipmirdit ahte dat lea duođaid dáhpáhuvvan, dadjá Niityvuopio.

Navdet badjelaš 30 jahkásačča čuggen

Politiját navdet muhtin badjel 30 jahkásaš dievddu guhte maid lei oahppi sámelogahagas, čuggen 17-jahkásačča. Son lea dál politijáid hálddus geat dutket ášši. Politiját leat muđui unnán cealkán dán áššis, muhto dadjet sin otná rájes buktit eambbo dieđuid.

Ohcejoga gielddas lea heahteveahkkefálaldat gieldda ássiide, muhto aigot maid erenoamaš psykiatriijabálvalusa cegget dán váhkku mielde.

Gielddadoavttir Heidi Eriksen rávve ollesolbmuid maid muitit mánáid geat soitet ballán dáhpáhusas.

– Geahččalit muitalit mii lea dáhpáhuvvon rehálaččat, muhto ii menddo olu daid detáljjaid. Ahte manná oačču man nu lágan ipmárdusa iežas oaivvis dán dáhpáhusas, dadjá Eriksen.

  • Guldal ášši:
    Ohcejoga nuorat morastit