– Vuosttaš maid dáhken odne lei iskkat yr.no dálkedieđáhusa, mas dieđihedje arvvi, dadjá Per Torleiv Ravna.
Son ja Ole Georg Pettersen, goappašagat Deanus eret, sihkkelastigoahtiba Offroad Finnmark distaga diibmu 1800. Gilvu lea birrasiid 700 kilomehter guhku ja bistá golbma jándora.
Ravna ii loga iežas ballat arvvis, muhto dálkkin ii leat nu buorre sihkkelastit.
– Veaháš arvi ii daga maidege, muhto jus šnjoarriarvi šaddá, de sáhttá leat unohas. Dalle šadda galmmas ja heajos coakcu.
Okte ollen molli ja nuppes fas vuollánan
Ravna muitala ahte soai leaba guovtte háve ovdal oassálasttán Finnmark Offroad 300 gilvvus, muhto dát lea vuosttáš háve go oassálastiba 700 gilvvohallamis, mii lea beali garraseappot gilvu.
– Munno mihttu lea ollet mollii. Dát lea dat čáffadeamos gilvu masa letne goassege searvan. Moai letne ovdal gilvalan Finnmark Offroad 300. Okte olliime molli, muhto nuppes fertiime vuollánit, dadjá son.
Per Torleiv Ravna čilge ahte soai leaba bures rahkánan gilvui. Dálvvi hárjehallan guhkes mátkkiid sihkkelastit, ja spinning- ja gievrudan-hárjehallamiid čađahan.
– Mađi vearrat dađi buoret
Munnje addá gilvvohallan earenoamáš dovddu, ja mun govvidan iežan dili eará ládje go gilvvohalan.
– Láven jurddašit mađi vearrat dađi buoret, dadjá Ravna.
Son illuda Iškorasvárrái duolmmastit ja sávvá dalle goarddesta beaivváš, go son lea gullán ahte dát báiki lea dat máilmmi fiidnámus báiki.
– Mun in leat goassege leamaš Iškorasas. Dán várrái ollet jáhkan okta dain mávssoleamos vásahusain gilvvus, muhto doppe dieđusge leat eará vásahusat maid masa illudan, dadjá son.
Sihkkelasttii Offroad Finnmark 150
– Dat ledje olu jeakkit. Dat lei fiertu, bahkka, bajándálki. Dat arvvi ja measta vel borggai, nu čilge Offroad Finnmark 150 oasseváldi Jon Egil Olli meahccesihkkelgilvvohallama.
Olli govvida alcces olmmájin gii ii vuollán gal ovttatmanus go juo mearrida juoga masa searvat, muhto mieđiha ahte lei maid buorre ollet mollii.
– Dat gal lei buorre dovdu, go mun lean hárjehallan dása sullii golbma jagi. Viimmat bessen sihkkelastit gilvvu.
Kárášjohkalačča mielas lea dát gilvu nu buorre iežas rupmašii ahte son lea juo mearridan boahtte jagi maid oassálastit.
– Mun áiggun searvat fas go meahccesihkkelastin lea lossat, muhtomin ferten sihkkelastit vaikko lea mieđas luohkká, dadjá son.