Čakčamánu 5. beaivvi 2016 váldá NRK Sápmi njeallje oahpahalli ohppui guđa mánnui.
– Mis leat njeallje oahpposaji. Dássážii leat ožžon 11 ohcamuša, muhto háliidivččiimet eanet. Mii dáhttut olbmuid geat duođai háliidit bargat medias ja geat máhttet sámegiela. NRK Sámis leat nu olu vejolašvuođat mediabarggu hárrái, lohká NRK Sámi oahpahalliortnega prošeaktajođiheaddji Berit Randi Nystad.
Berit Randi Nystad
Foto: Pressebilde / NRKOahppat bargat neahtain, radios ja TV:s
Oahpaheamis lea sihke teoriija ja bargohárjehallan, ja lea sierra oahppoprográmma oahpahalliide. Galgá oahppat bargat neahtain, rádios ja TV:s.
– Sii ohppet reaidduid maid dárbbašit NRK Sámi barggus - sihke teknihkket ja fuolahit rádiosáddagiid, radio- ja TV-áššiid ráhkadit. Ieža filbmet ja redigeret, sihke mobiltelefuvnnain ja videokameraiguin. Internehttii filbmet, govvidit ja čállit. Sii ohppet maid sámegiela, muitala Nystad.
Oahpahallanáigodat lea biddjon NRK Sámi váldodoaimmahussii Kárášjohkii.
– Go barget, de lea sis bagadeaddji ja doarjja. Maŋimuš mánu barget dan doaimmahusas masa eanemusat liikojit, maiddái dan áiggi leat sis eará bargit doarjjan. Mii fitnat maid johtimin, hásttuha Nystad.
Maŋŋel oahpahallanáiggi, de lea buoret vejolašvuohta beassat mediafágalaš ohppui allaskuvlla dásis.
Háliida ohcciid miehtá Davviriikkaid
Ollašuhtton joatkkaskuvlaoahppu dahje dábálaš studiegelbbolašvuohta fágasuorgin dáhttojuvvo sus gii ohcá oahpahallin. Buorre sámegiel máhttu, sihke čálalaččat ja njálmmálaččat, lea eaktun.
– Mii ávžžuhat ohcciid miehtá Davviriikkaid ohcat oahpahallin.
NRK Sápmi fállá bálkká oahppoáiggi, 15.000 ruvnno mánnui. NRK Sápmi fállá maid oahppostipeandda gitta 50.000 ruvnno rádjai jahkái nuoraide guđet álget mediaohppui.
– Dien stipendii lea čadnon dat ahte fállojuvvo sidjiide bargu maŋŋel. Ovttaláhkai leat don de sihkaraston barggu fidnet dáppe, lohká Nystad.
