NRK Meny
Normal

Oastá ealggabierggu čavčča rájes

Njuovahat lea dovdan ahte bohccobiergu lea vánis, nu ahte čávčča rájes oastigoahta njuovahat Aage Pedersen AS ealggabierggu.

Elg
Foto: Gunnar Søreng

Guldal: Oastigoahta ealgabierggu

- Dat lea buorre johttu ealggabierggus, lohká beaivválaš jođiheaddji Thor Aage Pedersen.

Aage Pedersen njuovahat lea ovdal ge vuovdán ealggabierggu maid lea oastán máddin. Pedersen muitala ahte báikkálaš ealgabivdit leat váldán sutnje oktavuođa go ieža eai jođit ealggabierggu priváhta.

Unnán bohccobiergu

Okta sivva manne njuovahat oastigoahta ealggabierggu, lea ahte sii leat ovdál vásihan ahte ožžot menddo unnán bohccobierggu njuovahahkii.

- Mii fidnet unnán bohccobierggu, ja go oastit ealggabierggu de bistá mis bargu guhkkit. Dál eat dieđe man ollu ealggabierggu mii fidnet, nu ahte dán jagi mii vuos geahččalat ja jus ealgabivdit eai vuovdde bierggu de eat joatke dainna boahtteáiggis, lohká Pedersen.

Ealga jođáneamos lági mielde njuovahahkii

Ealga galgá buktot oktan dulljiin, ja danin ferte ealga jođáneamos lági mielde njuovahahkii.

- Danin sáhttet dušše ealgabivdit Deanus, Kárášjogas ja Unjárggas vuovdit midjiide bierggu, lohká Thor Aage Pedersen.

Ealgabivdit positiiva

Guldal: Ealgabivdit positiiva

Leiboš ealgabivdinjoavkku jođiheaddji Per Erik Mudeina mielas lea buorre go njuovahat aigu oastigoahtet ealggabierggu. Su bivdinjoavku lea ovdal ferten loahpahit bivddu árabut dan sivas go eai nágot jođihit bierggu priváhta.

Njuovahat máksá baddjelaš 70 kruvnnu kilos ealggabierggu ovddas, ja dat orro Mudeina mielas dohkálaš haddi.

- Go beassá olles gorudii vuovdit ja sii njuvvet dan, de ii oro diet haddi gal nu vearrái, lohká Mudeina.