NRK Meny
Normal

Oasálasttán vuosttaš gearde Arctic Challengeas - áigu ruovttoluohta boahtte jagi

Mannan lávvordaga lágiduvvui Arctic Challenge Levis. Gámasmohkkilaš Roosa Nuorgam lei okta dain gii searvvai dása.

Iida Nuorgam, Mari Kulovesi, Aili Nuorgam ja Roosa-Maria Nuorgam

GEARGUSAT GILVALIT: Iida Nuorgam, Mari Kulovesi, Aili Nuorgam ja Roosa-Maria Nuorgam.

Foto: Arctic Challenge

Arctic Challenge lea gilvu mii lea 10 kilomehtera guhkki. Gilvvus leat iešguđetlágan fysalaš hástalusat maid galgá čađahit, omd. gomihit lossa rieggáid, gurpput lossa tiŋggaid ja viehkat ollu.

Aili Nuorgam, Roosa-Maria Nuorgam, Iida Nuorgam

IEŠGUĐETGE HÁSTALUSAT: Aili Nuorgam, Roosa-Maria Nuorgam ja Iida Nuorgam rásttildeamen jávri.

Foto: Ville Nuorgam

Mannan lávvordaga lágiduvvui Arctic Challenge doalut Levis Suomas. Dat lea goalmmát geardde go doalut lágiduvvojit.

Vuosttaš jagi 2015 oasálaste 150, dán jagi lea lohku sturron ja ledje badjel 700 oasálastit.

Duhtavaš gilvvuin

Gámasmohkkilaš Roosa Nuorgam oasálastii vuosttaš geardde su ustibiiguin Arctic Challengis dán jagi ja ledje alla vuordamušat.

Son ja su joavku geavahedje sullii 4 tiibmu dása. Gilvvuin ja áiggin leat sii hui duđavačča. Sii lohket boahtit ruovttoloahtta boahtte jagi maiddái.

– Boahtte jagi fas mielde, ja dál lea buoret áigi hárjehaddát ja mii áigut geahččalit buoridit min áiggi, muitala Nuorgam.

Ollen mollii: Iida Nuorgam, Roosa-Maria Nuorgam, Aili Nuorgam ja Mari Kulovesi

JUSTA OLLEN MOLLII: Iida Nuorgam, Roosa-Maria Nuorgam, Aili Nuorgam ja Mari Kulovesi.

Foto: Ville Nuorgam

Boatkaluvván ja rámis iežas joavkkuin

Stuorámus hástalus lei viehkat guhkes milliid bajás ja gurput lossa muorrabihttá.

Dál lohká Nuorgam iežaset oalle boatkaluvván gilvvu maŋŋil ja boahtá dovdat dán olles vahkku.

Iida Nuorgam, Roosa-Maria Nuorgam ja Aili Nuorgam

GORGŊOT: Iida Nuorgam, Roosa-Maria Nuorgam ja Aili Nuorgam.

Foto: Ville Nuorgam

Nuorgam rámida maiddái iežas joavkku. Lohká sis lei hui buorre áŋgirisvuohta joavkkus.

– Lean eahpesihkar livččen go ollašuhtán gilvvu iežan joavkku haga, loahpaha Nuorgam.