NRK Meny
Normal

Oajvvat sáme giellaguovdátjav Bådåddjuj

Sámedikkeráde vuojnná dárbov giellaguovdátjij Nordlánda stuorámus stádan. – Ájgge l dal, vásstet smávmánájieddne.

Ann-Mari Thomassen

– Nordlanda stuorámus stádan viertti giellaguovdátjav, javllá Ann-Mari Thomassen.

Foto: Mette Ballovara / NRK

– Dåppen årru nav moadda julevsáme, bihtámsáme ja aj oarjjelsáme. Lij læhkám huj buorre jus lijma oadtjum institusjåvnåv dåppe.

Dá vahko le giellakonferánssa Ájluovtan, Divtasvuonan, ja moadda giellabargge lidjin tjåhkanam gå sámediggeráde Ann-Mari Thomassen oajvvadij sáme giellaguovdátjav Bådåddjon tsieggit.

Bådåddjo le oajvvestáda

– Usjudalliv sierra goadev gånnå giella vuojnnu ja gullu. Bådåddjo le má oajvvestáda julevsáme ja bihtámsáme guovlon. Dárbbo le guovdátjij jus sámegiella galggá bissot ja åvddånahteduvvat dáj bájkij.

Ávvosáhka

Smávmánájieddne oajvvadusáv rámmpot.

Rakel-Iren Pedersen

Rakel-Iren Lillehaug Pedersen ávvus jus giellaguovdásj Bådåddjuj tsieggiduvvá.

Foto: Sander Andersen / NRK

– Midjijda gudi årrop Bådåddjon le dát stuorra miellahivádis. Muv máná le gielav låhkamin, ja jáhkáv le sierraláhkáj ávkken mánájda ja aj midjij æjgádijda. Giellaguovdásj ij dåssju stádav vájkkuda, valla ålles birádisáv.

Dav javllá Rakel-Iren Lillehaug Pedersen, gudi l ieddne gålmmåsij.

Rudájt åttjudit

Valla gåktu giellaguovdátjav Sámedikke budsjæhttaj oadtjot, ittjij Thomassen sidá náv árrat vásstedit.

– Dav mån iv sidá jur dálla giehttot. Vierttiv gullat jus Sámedikken le sæmmi vuojno gå mujna.