Oaidná dálkki albmanáhkis

Áhkkávággilaš Halvdan Nilsen (81) lea mánnávuođas juo oahppan čuovvut dálkki albmanáhki bokte, dát lea čuvvuon buolvvas bulvii.

Bivvalis beassážat

Nilsen ohcala albmanáhki go álge dálkki birra ságastallat. Dás son sáhttá oaidnit makkár dálki šaddá.

Nilsen bláđesta vuos njukčamánnui, ja de oaidná ahte mánnu riegáda oarjin, ja dán mánu, cuoŋománu de riegada nuortan. Dán vuođul sáhttá son oaidnit makkár dálki šaddá, go mánnu riegáda oarjin de šaddá áhpedálki.

Áhpedálki, de dávjá bosoda biegga ja ii leat nu buorre dálki. Muhto jus mánnu riegáda nuortin (nugo dán jagi cuoŋománu, diibmu 14.16), de bissu dálki, dahje eai šatta galbma dálki, lohká Nilsen. Nu ahte dáid beassážiid gal šaddá bivval, sáhttet idjabuollašat. Ja, sii geat áigot olgun leahkit beassážiid, ná de gal besset vásihit beaivváža maid, lohká Nilsen.

• Loga maid: Dálkeeinnosteddji: – Muohttá dán mánu loahpas

Čuoigá vaikko makkár dálkin

Liv Rundberg orru Áibánáššis Gáivuonas. Liv lea ovddeš musihkka skuvlla rektor, muhto dál lea ealáhahkii ollen, ja de sus lea asttu čuoiggadit isidiinnis, Øyvind, ja sudno beatnagiin.

Sii leat meastá juohke beaivvi čuoigamin, leaš dál čáppa dahje heajos dálki. Muhto Liv Rundberg mieđiha ahte liiko buorebut čuoigat čáppa dálkin.

Liv Rundberg illosa go gullá ahte Halvdan Nilsen oaidná buori dálkki.

– Jáhkát go don dákkár dálkeeinnosteddjiide?

– Ná, jáhkán muhttomin, muhto ii álot, lohká Liv Rundberg.

• Loga maid: Jus otne lea bivval, de šaddá bivvalis giđđa