NRK Meny
Normal

Gii lea NRK Sámi boahttevaš hoavda?

Son gohčoduvvui ČSV-mánnán. Máŋgii lei cielussátnin oaivvilduvvon, muhto ieš válddii gohčodeami gudnin. Odne ovdanbuktá Mona Solbakk iežas ođđaáigásaš johttisápmelažžan.

Mona Solbakk

Fanasgieddelaš Gáivuona-ássi, Mona Solbakk (43), álgá NRK Sámi hoavdan.

Foto: Privat

– NRK Sápmi ja NRK Sámi Rádio lea ovtta láhkai bajásgeassán mu. Ledjen viehka nuorra go álgen sámerádioi. Bohten njuolga joatkkaskuvllas rádiobargui, nu gohčoduvvon hárjehallin.

– Dalle bođii miella journalistan šaddat.

Earret eará dáid muitalii NRK Sámi boahttevaš hoavda, Mona Solbakk, «Duorastatmágasiidna»-nammasaš prográmmas, sámerádios.

– Håhåy. Dadjen «sex» logi geardde(!)

– Muittán erenoamážit go áigguimet oktii «gilvalit» man bures sáhttá ášši tabloidiseret. Maŋŋá lean guldalan ášši.

– Håhåy, jáhkán mun dadjen «sex» logi geardde dahje nu dan ovtta ja seammá áššis. Ášši lei vissa klamydia birra, ja ledjen oalle tabloida, boagusta Solbakk.

Dálvvit 2014 lei Mona Solbakk guossi tiibmosaš guhkes rádioprográmmas, mas muitalii iežas birra.

Son lea ovdal bargan 15 jagi NRK Sámis. Lea earret eará leamaš doaimmahushoavda, prográmmahoavda, ja sadjásaš sámerádiohoavda.

Lea maiddái bargan Tromssa Universitehta gulahallanhoavdan čieža jagi.

Dassážii go álgá NRK Sámi hoavdan, de loahpaha Mona Solbakk iežas dálá jođiheaddjivirggi, Davvi álbmogiid guovddážis, Gáivuonas.

Gáiccat jágejedje su váris vulos?

– Mun lean albma «TIFFár», dajai Mona Solbakk maiddái prográmmas.

Muhto mii dat albma TIFFár lea?

Ja mo árpmuid dagahii ovddeš sámediggevárrepresideanta, Laila Susanne Vars, dieđikeahttá nu, ahte Mona Solbakk searvvai dan nu gohčoduvvon «selfie-trendii»?

Ja leago Mona Solbakk goassige boŋkaluvvon bahtii, guođohettiin gáiccaid?

Dáid oaččut diehtit, jos guldalat prográmma dás vuolábealde:

Son lea NRK Sámi boahttevaš hoavda. Muhto gii lea son? Dán prográmmas beasat suinna oahpásmuvvat lagabui.

Son lea NRK Sámi boahttevaš hoavda. Muhto gii lea son? Dán prográmmas beasat suinna oahpásmuvvat lagabui. Vuoigatvuođaáššiid hárrái lea musihkka váldon eret prográmmas, neahttaalmmuheami dihtii.

Ovddeš NRK Sámi sátneduojár

Mona Solbakk lea duollet dálle leamaš NRK Sámi sátneduojár.

Guldal su sátnedujiid dás ja dás.