– Hávga lea buorre biebmoguolli, ja das lea erenoamaš buorre ráhkadit hávgagáhkuid, lohká áŋgiris hávgabivdi Rolf Ante Hætta.
Son orru Ávžžis Guovdageainnu. Olles giđa son bivdá
hávggaid, sihke firpmiin ja stákkuin.
– Hávggaid lea buoremus bivdit ovdal go čáhci beare haga lieggana. Geasset das šaddá botnesmáhkka, lohká son.
Áhkus oahppan
Son lea mánnán jo oahppán iežas áhkus mot hávggas sáhttá ráhkadit guollegáhkuid.
– Hávgagáhkuid sáhttá ráhkadit feara mot. Dábaláččat láven seaguhit veahá čuovžža vel dasa, go dat lea veahá buoiddit guolli go hávga. Dán háve ii lean čuovža, nu ahte de bidjen veaha spiinnebuoiddi. Hávgga lea oainnat hui guoira guolli ja vai guollegáhkut eai šatta nu goikasat, de lea buorre dasa lasihit veahá buoiddi, lohká son.