Áltta Bearašsuodjalan-kántuvra fállá sihke nissoniidda ja almmáiolbmuide kurssa mas galggašedje oahppat muddet iežaset suhttu. (Joatke lohkat vuolábeal gova.)
Lágida goalmmát háve kurssa
Dál fállá Áltta Bearašsuodjalanguovddáš goalmmát kurssa, ja dasa gal dál servet dušše almmáiolbmot. Nu muitala Áltta Bearašsuodjalankántuvrra bearašterapevta ja suhttomuddenkurssa lágideaddji, Maren Rapp.
Son muitala iežas leat okta dain gii lágida suhttomuddenkurssaid. Dattetge ii máhte son riekta čilget mo dat lea dat suhttu maid sii hálidiivčče oahpahit olbmuide mo dan unnida. Buot olbmot gal suhttet, muhto muhtin olbmuin lea suhttu nu vearrái ahte dát dagaha váttisvuođaid dan olbmui.
-Dákkár olbmuide livččii leat vuogaš váldit kurssa mas oahpašedje muddet iežaset suhttu, dadjá Rapp. Dávjá lohká leat nu ahte dát olbmot illá ieža fuomášit iežaset suhttus, ja das mo dát čuohcá earáide. Danne lea dávjá nu ahte eará olbmot dat fuopmášahttet man unohas ja bávččagahtti dat lea dán olbmos dat suhttu. ( Logus joatká video vuolábealde)
Dál lágidit sii goalmmát suhttomudden kurssa, ja dán háve servet dušše almmáiolbmot. Vuosttaš kurssas ledje sis maid beare almmáiolbmot. Nuppes go lágidedje dákkáraš kurssa, de serve dušše nissonolbmot, ja dál lea fas dušše almmáolbmuide dat kursa.
Eai seagut sohkabeliid
Eai sii seagut nissoniid ja almmáiolbmuid, danne go dávjá lea nu ahte nissonat ja almmáiolbmot dat riidalit ja suhtadit. Maren Rapp lohká kursaoassálasttit muitalit ieža mo sii vásihit iežaset suhttu.
Doaruheaddji ovddasvástádus
Veahkaválddálašvuođa galggašedje maid nagadit bissehit, ja kurssas ohppet ahte dat gii časká dahje doaruha nuppi, sus leat alddis váttisvuođat. Doaruheaddjis lea álo ovddasvástádus dasa maid dahká.
Kurssas ohppet geavahit eará vugiid, mo dahkat, danne go veahkaválddálašvuohta ii čoavdde maidige. Suhttu maid sáhttá lohkat leat veahkaválddálašvuohtan.
Psykalaš seamma vearrái go fysalaš
Maren Rapp lohká ahte psykalaš veahkaválddálašvuohta lea seamma go cápmin ja huškun, danne go dat dahká seamma bákčasa ja vel verret bákčasa go huškun dahje doaškkasteapmi.
Danne go psykalaš veahkaválddálašvuohta daguha dan ahte olbmot, nugo mánát šaddet dakkáraš fáktendillái, sii leat álo ballamin das ahte goas dal áhccis dahje eatnis beaškkeha suhttuin. Son muitala ahte dávjá lohket olbmot ieažaset suhttat danne go dovdet iežaset dego badjelgehččon dahje go dovdet iežaset bávččagahtton.
Guovttelagan veahkaválddálašvuohta
Veahkaválddálašvuođa lohká Rapp leat guovttelaganin, psykalaš veahkaváldimin ja fysalaš veahkaváldimin.
Fysalaš veahkaváldin lea dieđusge várálaš, go máŋgii muhtun jápmá dan geažil. Psykalaš veahkaválddálašvuohta lea ges dakkár mii bilida olbmo, danne go álo ferte juolgesuorpamaid alde njágadit ammas geange suhttadit dahje muosehuhttit:
Rapp čilge ahte lea veahkaválddálašvuohta jos mánát dahje eamit álo ballet go vulget ruoktot. Go fertejit suokkardallat makkár dilli ruovttus lea. Leago mat áhčči movtta, vai leago suhtus. Dákkár dilli dagaha olbmuide psykalaš váttuid.
Dán gohčoda Maren Rapp psykalaš veahkaválddálašvuohtan. Muhto veahkaválddálašvuohta lea maid dat jos eamit seksuálalaččat givssiduvvo, dahje matriálalaččat givssiduvvo, jos bálku nuppi maŋŋái biergasiid, cuvke nuppis mobiltelefovnna dahje cuovku lihtiid. Go nu maid geavvá ahte son gii lea suhttan, gomiha olles beavddi go leat boradeamen. Suhttu mii lea nu vearrái ahte ii nagat stivret iežas.
Justa diekkáraš suhttui lea vejolaš oažžut veahkki suhttomudden-kurssas Álttás.
Váldde oktavuođa
Álttá Bearašsuodjalanguovddážiin lea vejolaš váldit oktavuođa ja jearrat beassat dákkáraš kursii.