Dan oaivvilda sierra cealkámušastis maid otne lea sádden Suoma stáhtii.
Suoma Sámedikki presideanta Tiina Sanila-Aikio lea giitevaš ON doarjagiin.
– Dat lea dehálaš doarjja sápmelaččaide, lohká Sanila-Aikio
Riikkabeaivi lea gieđahallamin ášši
Suoma Sámediggi lea garrasit moaitán ođđa láhkaárvalusa go sin mielas dat badjelgeahččá sámiid beroštumiid eanangeavaheamis.
Muhto ráđđehus ii leat váldán vuhtii moaitámušaid, ja lea ovddidan láhkaárvalusa Riikkabeaivái.
Riikkabeaivi galgá gieđahallat árvalusa guovtti oasis. Vuosttaš gieđahallan dáhpehuvvui mannan vahkus. Nubbi ges galgá leat beassážii maŋŋá.
Dáhttu buoret gulahallama
ON Olmmošvuoigatvuođaid allakomiseara ávžžuha Suoma stáhta bissehit láhkarievdadusa dassážii go lea gulahallan Suoma Sámedikkiin ja sápmelaččaiguin.
Suoma Sámedikki presideantta mielas livččii imaš jus Suoma stáhta ii gidde fuomášumi ON ávžžuhusaide. Dattege illá jáhkká cealkámuša sáhttit jorgalahttit ráđđehusbellodagaid.
– Sis lea eanetlohku Riikkabeaivvis, ja danin balan garrasit ahte láhkarievdadus čađahuvvo Riikkabeaivvis, vástida Sanila-Aikio.
Láhka nanne stáhta oamasteami
Ođđa láhka addá eambbo fámu Suoma stáhtii hálddašit čáziid- ja eatnamiid sámi guovlluin.
Seammás ráđđehus lea lohkan ahte ii mihkkige galgga rievdat dálá hálddašeami ektui. Muhto daid lohpádusaide sámediggepresideanta ii jáhke:
– Sii leat gal guldalan maid mii oaivvildat, muhto dađi eambbo váikkuhusat das eai leat. Láhkii goit eai leat bidjan makkárge paragráfaid mat dal válddášedje vuhtii sápmelaččaid berostumiid eanangeavaheamis, sámediggepresideanta ákkastallá.
– Čahkkejit saji vearrásiidda
Sámediggi ballá ođđa meahcceráđđehuslága rahpat vejolašvuođaid fitnodagaid omd. čuohppagoahtit vuvddiid gos dássážii eai leat beassan.
– Muhto maiddái turistafitnodagaide sáhttá šaddat álkit beassat oastit eatnamiid iešguđet huksemiid várás. Mas mii diehtit makkár plána sis leat, sámediggepresideanta ákkastallá.
Ja lasihastá:
– Go stáhta lohká iežas oamastit guovlluid, de mis sápmelaččain dieđusge šaddá unnit váikkuhanvejolašvuohta eanangeavaheamis. Láhkarievdadus geanohuhttá min luohttámuša stáhtii, čilge Suoma Sámedikki presideanta Tiina Sanila-Aikio.
ON Olmmošvuoigatvuođaid allakomiseara lea maid vuorrástuvvan Brasilia álgoálbmogiid dilis.
