Ožžot rámi ja diploma

Stuorravuona skuvllas Unjárggas lea ihttin stuorra doalut, danne go dát skuvla galgá čálmmustahttot go leat nagadan buoridit mánáide beaivválaš skuvlladili.

Stuorravuona skuvla

Stuorravuona skuvla

Foto: Unjárgga suohkan

Ášši doaimmaha Ánne Olli

Dán skuvllas leat nannosit bargan bissehit cielahemiid, bilkidemiid ja givssidemiid. Skuvla lea ohcan "Benjaminbálkkašumi", ja dál galgá skuvla čalmmustahttot diplomain ja gudniin, nu muitala Finnmárkku fylkkamánni oahpahusossodaga ráđđeaddi Laila Smuk.

"Benjaminbálkkašupmi"

Dán jagi leat 10 jagi vássán das rájes go Benjamin Hermansen goddui. Son goddui danne go lei earalagan go earát, su liikeivdni lei earralagan go dábálaš norgalaččas. Su goddin lei rasisttalaš dahkku.

Benjamin goddima rájes leat ásahan Benjaminbálkkašumi, ja dán bálkkašumi juhket juohke jagi, dakkáraš skuvlii mii áŋgirit lea bargan givssideami, rasisma ja badjegeahččama vuostá. Bálkkašumi juhket rikkaidgaskasaš Holocoust beaivvi, mii lea ođđajagimánu 27. beaivve.

Rektor illuda

Berit R. Nilssen og Erling Fløtten

Berit Ragnveig Nilssen

Foto: Nils Henrik Måsø / NRK

Stuorravuonskuvlla rektor Berit Ragnveig Nilssen illuda go skuvla lea olahan nie bajás. Son muitala iežaset ohcan Benjaminbálkkašumi, danne go leat nagadan guhkes áigge bargguin, buoridit skuvlladili mánáide. Sii leat mánáid ožžon heitit girvvideames nuppiid, ja buohkain leat dál ráfálaš skuvllabeaivvit.