Sámi TV-ođđasiin leat maŋimuš vahkuid áigge leamaš máŋga ášši gos dihto sámi njunnožat cuiggoduvvojit go galget leat juohkaláhkái meaddán doaimmaineaset. Sámedikki várrepresideanta Johan Mikkel Sara gárttai Ođđasiid šerres čuvgii go manai mátkái maid Statoil fitnodat lei máksán. Sámediggepresideanta gis cuiggoduvvo go lea doallan almmolaš rahpama moatti priváhta fitnodaga dilálašvuođas. Sámi servodatnjunnožiid mielas orrot dát áššit ráhkaduvvon duššis.
Ovttabealát kritihkka
Sámi allaskuvlla journalistaoahpu jođiheaddji, Arne Johansen Ijäs, oaivvilda NRK Sámi Radio journalistihka caggat sámi našuvdnahuksema. - Šaddá boastut bás uhca sámi servodagažii go jođihuvvo ovttabealát kritihkalaš journalistihkka, lohká Ijäs Finnmarken áviisii.
- Mii eat leat vel geargan našuvdnahuksemiin ja eallit uhca rašis servodagažiin, oaivvilda Ijäs.
Njunuš nissonolbmot moaráskan
Mannan lávvardaga Min Áiggis čállet Sámi allaskuvlla bargit Rauna Kuokkanen, Asta Balto, Solveig Joks ja Liv Østmo lohkkiidčállosa mas garrasit cuiggodit NRK Sámi Radio journalistihka mii čájehuvvo TV-ođđasiin. Badječála lea "Sámi Radio njeaidimin sámi álbmoga árvvolašvuođa" ja dát čujuha namahuvvon "skandálaide".
"Sámi Radio berre jearrat man láhkái gii gokčet iežas ulbmila leat sámi servodaga iešdovddu nannejeaddji ásahussan, iige kopiija muhtin dáža cuiggodeaddji journalistihkkii", čállet nissonat.
Servodatdutki cuiggoda
Servodatdutki Jorunn Eikjok lea maid cuiggodan TV-ođđasiid lohkkiidčállosiin Min Áiggis ja Finnmark Dagblad áviissas. Songe oaivvilda, ahte Ođđasat ráhkadit duššis sensašuvnnaid.
Mannan lávvardaga Min Áiggis lea NRK Sámi Radio prográmmaredaktevrras, Rávdná Nilsdatter Buljos, vástádus Eikojok cuiggodemiide. Son čujuha nugohčoduvvon "Leage várrugas plakáhtii". Doppe son lohká gávdnat vuođu jođihit dákkár journalistihka.
