Ođđa vejolašvuođat Sápmái

Ikte lei ávvobeaivi go stuora DHL gálvogirdi seaivvui vuosttaš geardde Levdnjii.

Porsáŋggo sátnejođiheaddji Aina Borch rabai girdiruvtto mii galggašii leat ávkin sihke guolle- ja boazoealáhusaide.

– Mis lea olu guolli ja maiddai bohcco biergu maid sihke Norga ja máilbmi háliidit, dadjá Borch

DHL fievrrida gálvvuid miehtá máilmmi, ja dát gálvoruvtto galgá oktii vahkus fievrridit varas biepmu Leavnnjas Osloi.

Dat mearkkaša ahte dál leat maiddai Sápmái rahpasan máilmmimárkanat.

Nu varas go vejolaš

Europa DHLa direktevra Henk Venema lei boahtán ávvudeapmái, ja muitala ahte son jáhkká dán prošeavtta lihkostuvvot.

– Man jođánit olmmoš oažžu biepmu lea dehálaš. Olbmot áigot nu varas biepmu go vejolaš, dadjá Venema.

Dát ruvtto dahká ge juste dán. Go Leavnnjas sáddejuvvojit gálvvut gaskabeaiáiggi, de sáhtát eahkedis Oslo restauránttain daid borrat varasin.

Olaha eará márkaniid

Bovdejuvvon guossit ledje maid boahtán vuostáiváldit girdi. Sámediggeráđđi Per Mathis Oskal oaidná dás vejolašvuođaid.

– Stuora vejolašvuođaid boahtteáiggis, ja olaha nai diekkár márkaniid maid odne ii leat olahan. Nu ahte mun oainnán das stuorra vejolašvuođaid nai sámi ealáhusaide.

Dán mátkkis sáddejedje gonagasreappáid girdi mielde mii goastada 40 tonna gálvvu. Muhto Venema dadjá ahte lea maid vejolaš sáddet eará gálvvuid Leavnnjas Osloi ja ruovttoluotta.