Biret Margrethe Oskal lea olu jagiid bargan musihkain ja lea čuojahan konsearttain máŋgga oktavuođas. Son lea maiddái searvan Sámi Grand Prixii máŋgii, muhto lea vuosttaš geardi go almmuha cd-skearru.
Lávlagat ja luođit
"Mátki" lea olles cd-skearru mas leat 10 lávlaga ja luođi maid Birkir L. Gudmundsson lea buvttadan. Oskal ja Gudmundsson oahpásmuvaiga go leigga mielde Boŋgg Ántte cd-singela buvttademiin. Musihka sáhttá ge govvidit dego mátkin iešguđetlágán musihkkasurggiid ja -vugiid čađa. Mátki lea árbevirolaš ja ođđamállet musihka seaguhus, mas leat sihke árbevirolaš luođit ollamállet jietnagovain ja ođđamállet lávlagat main vuhtto árbevirolašvuohta. Muhtun lávlagat ja luođit leat sihke hui ritmalaččat ja movttegat, ja earát ges leat jaskadeappot ja akustalaččat. Musihkka heive vaikko guđelágán beljiide.
Ieš ruhtadan cd
Biret Margrethe Oskal lea ieš čállán lávllateavsttaid ja šuoŋaid, earret ovtta lávlagii masa Inger Johanne Oskal lea bidjan šuoŋa. Luđiin maid juoigá, lea Biret Margrethe ieš bidjan guokte, ja earát ges leat árbevirolaš luođit mat leat ođđamállet musihkkii heivehuvvon. Biret Margrethe Oskal ruhtada ja almmuha cd ieš.
Golbma cd ilbmet seamma beaivvi
Almmuheami oktavuođas lágiduvvo preassakonferánsa Kaffegalleriijas Guovdageainnus maŋŋebargga cuoŋománu 3. b. dii. 16.00, ovttas guvttiin eará sámi artisttain geat maiddái almmuheaba ođđa skearruid dáid beassážiid, Soai leaba Ann-Mari Andersen ja Boŋgg-Ánte. Seamma eahkeda dollojuvvo maiddái almmuhankonsearta Alfreds Kroas. Biret Margrethes leat čuojaheaddjin, Svein Schultz, Stein Austrud, Klemet Anders Buljo og Ole Jacob Larsen.
