NRK Meny
Normal

Váhnemat juhket – mánát eai oačču veahki

Máŋggaduhát Norgga mánás leat váhnemat geat gillájit jugešvuođas dahje gárrenmirkkogeavahemiin. Eai buot dát mánát oačču veahki, čájehuvvo raporttas.

barn av rus

(ILLUSTRAŠUVDNA).

Foto: Colourbox

– Juovllat ledje vearrámusat. Dalle láviiga eatnán- ja áhččán guovttos doapmat mu bidjat seŋgii nohkkat árrat, go dalle áigguiga bihkká juhkaluvvat.

– Dát lei buot deháleamos sudnuide, vai beasaiga juhkagoahttit.

Nie muitala Hilde Marie Heggernes NRK:i.

Son orui mánnán badjel logi jagi iežas váhnen guoktáin, geat guktot gilláiga jugešvuođas.

Son ii leat áidna dákkáriid vásihan mánnán.

7000 máná gillájit

Norggas leat dál sullii čiežaduhát máná geain leat váhnemat geat dálkkoduvvojit, dahje ožžot monu lágan divššu, jugešvuođa dahje gárrenmirkkogeavaheami vuostá.

Dát boahtá ovdan ođđa iskkadeamis maid Dearvvašvuođadirektoráhta lea gieskat álmmuhan.

Rapportas boahtá maid ovdan ahte máŋggas dáin mánáin, eai oačču makkárge veahki dearvvašvuođabálvalusain.

– Eai ádde mánáid veahkkedárbbuid

Ruud

FUOLASTUVVAN MÁNÁID HÁRRÁI: Torleif Ruud lea Oslo Universitehta professor, Klinihkkalaš dálkkodeami instituhtas.

Foto: Privat

Rapportas boahtá maid ovdan ahte go mánát eai oačču veahki, de mearkkaša ahte Erenoamáš- ja gieldadearvvašvuođabálvalusat dávjá rihkot lága.

– Dearvvašvuođabargit eai álo ádde mánáid veahkkedárbbuid dákkár áššiin. Eará háviid eai sii oppa fuomášge áhte dálkkodandárbbašeaddjis lea mánná.

Nie kommentere professora, Torleif Ruud NRK:i.