Ođđa politihkalaš ráđđeaddi - Sámeráđis Sámediggái

Sámediggepresideanta Aili Keskitalo lea ikte nammadan skánitlačča Lásse-Ivvár Erkke Sámediggeráđi politihkalaš ráđđeaddin.

Eirik Larsen

Eirik Larsen asmegielnamma lea Lásse-Ivvár Erke.

Foto: Jenna Rasmus / NRK

– Lean hui giitevaš luohttámuša ovddas ja illudan bargagoahtit Sámedikki samepolitihkain, maŋŋelgo lean máŋga jagi lean bargan eará bargguid, lohká Lásse-Ivvár Erke.

Aili Keskitalo utenfor Universitet i Oslo om vinteren

Sámediggepresideanta Aili Keskitalo.

Foto: Mattis Sara Wilhelmsen / NRK

Lásse-Ivvár Erke bargá dál Sámeráđis olmmošvuoigatvuođaid ossodaga jođiheaddjin. Son lea nammaduvvon Sámediggeráđi ráđđeaddin 2017-2021 áigodahkii.

Lásse-Ivvár Erke lea jurista, ja sus lea master riektediehtagis UiT Norgga árktalaš universitehtas. Son lea bargan guhtta jagi Geildda- ja ođasmahttindepartemeanttas, Sámi ja minoritehtapolitihkalaš ossodagas (2011-2016).

Illuda ovttasbargui

Sámediggepresideanta Aili Keskitalo illuda maid bargagoahtit ovttas ođđa politihkalaš ráđđeaddiin.

– Lásse-Ivvár Erke lea čeahppi ja sus lea nanu fágalaš duogáš ja viiddis hárjáneapmi. Son boahtá nannet min politihkalaš barggu vuoigatvuohtaprofiilla, lohká Keskitalo.

Lásse-Ivvár Erke álgá bargui ođđajagimánu 1. beaivvi, ja galgá bargat Guovdageainnus.