NRK Meny
Normal

Ođđa Mama Sara

Sosiálamediat leat máŋgii ávkin, nu vásihii Inger Kristina Gaup go lei ođđa barggu ohcamin. Son lea aiddobáliid gearggahan bacheloroahpu, ovdánahttinoahpus, dál son lea duolbmugoahtán Mama Sara bálgáid, ođđa hálddahushoavdan veahkkeorganisašuvnnas.

Mama Sara, skoleåpning

Mama Sara lea addán Masaimánáide Tanzanias vejolašvuođa skuvlla vázzit.

Foto: Mika Saijets / NRK

Gieskat dieđihii Gunhild Berit Sara Buljo, ieš dat Mama Sara, ahte son luohpáloahppá virggistis Norgga unnimus veahkkeorganisašuvnnas ja geige ovddasvástádusa nuorra fámuide. Son lei ohcamin olbmo, gii heivešii su barggu váldit badjelasas go fuomášii Inger Kristina Gaupa bargoohcamuša Facebookas. Nu Mama Sara hásttuhii Gaupa joatkit su barggu veahkehit eamiálbmogiid veahkkeorganisašuvnnain, maid son álggahii 2005s.

Badjeláhpiid váiban

Organisašuvnnas lea ođđa stivra, muhto Mama Sara dahje nu go jo masaiat maid su gohčodit «moddjás váibmoláđis nisu» Gunhild Berit Sara Buljo, lohká iežas buriin dovdduin guođđit ámmáhis earáid háldui. Nu beassá ieš bosihit veaháš go dákkár stuorra ovddasvástádus fámuid borrá.

Gunhild Berit Sara Buljo og masaier

Gunhild Berit Sara Buljo masaiaid guossis Tanzanias.

Foto: Liv Inger Somby

– Mun ledjen duođaid váiban, mun ledjen badjeláhpiid bargan guhkit áigge ja loahpas de váiben.

Muhto ii son loga álki gal čohkkedit ja vuoiŋŋastit go lea hárjánan álohii huša siste, muhto ii son bala ahte báhcá barggu haga ja dušše biepmadid gieđaid, go organisašuvnnas gal gávdno álohii bargu masa son sáhttá duollet dálle leat veahkkin.

Gula eanet dán áššis otná Árdna- rádios tii. 16:30

Háliida buoridit máilmmi

Aiddo oahppan nisu, Inger Kristina Gaup, muitala sutnje lei oalle stuorra gudni go Mama Sara válljii su veahkkeorganisašuvnna ođđa hálddahushoavdan. Heivii ge bures servvodatberošteaddjái.

– Mus lea álohii leamaš miella bargat juoga buori dán máilmmis, servvodahkii gal lea mus beroštupmi.

Gaup muitala sus livččii miella gárvet bargguid mainna leat álgán Tanzanias, muhto maiddái hukset joatkkaskuvlla dohko, vai mánáin ja nuorain lea vejolašvuohta dan oahpu maid gazzat.