NRK Meny
Normal

Ođđa instituhtta áimmahuššat árbevirolaš luossabivddu

Ovttasbargu Norgga ja Suoma riikkarájá rastá galgá áimmahuššat deanočázádaga árbevirolaš luossabivdovugiid.

Aage Solbakk

Aage Solbakk lea stivrrajođiheaddji ođđa instituhtas mas lea namma Deanu Instituhtta Org.

Foto: Anne Olli

Deanoleahkái lea vuođđuduvvon ođđa ásahus, Deanu Instituhtta Org. Ulbmil lea earret eará áimmahuššat Deanočázádaga árbevirolaš luossabivdovugiid, čilge ođđa ásahusa stivrrajođiheaddji Aage Solbakk.

– Mii fertet organiseret dakkár instituhta mii fátmmasta guktui beale Deanu. Dehálaš lea dál čohkkegoahtit buot dieđuid mat gávdnojit luossabivddu árbevieruid birra, lohká Solbakk.

Instituhta stivrras leatge lahtut sihke Suomas ja Norggas.

– Dieđuid áigu vuosttažettiin almmuhit álbmogii ja guovllu olbmuide ávkin. Mo lea dáhpáhuvvan ja dáhpáhuvvá ain otne árbevirolaš luossabivdu dáppe. Nu lohká Solbakk, gii čilge ahte earret eará diehtojuohkkin girjjiid ja kárttaid galget addit de maiddái eiseválddiide, geat rahkadit bivdonjuolggadusaid.