SuperLotto-oppalaš vuoitu lei dán háve oktiibuot sullii 40 miljovnna, mii mearkkaša 1.333.330 miljovnna ruvdno juohke vuoitái. Speallofitnodat, Norsk Tipping dat čađahii dán vuorbádeami mas boađus lei 30 ođđa SuperLotto-millionearat.
Guovdageidnui vuoitu
– Dát gal duođaid lei hui hávsi, ja áibbas vuordetmeahttun, lei vástádus maid Guovdageaidnulaš dadjái go Norsk Tipping válddii oktavuođa.
Soma gullat
Guovdageainnu suohkana sátnejođiheaddji, Johan Vasara, lohka soma gullat ahte Guovdgeidnui fas lea boahtan ođđa millioneara Norgga speallofitnodaga vuorbádeami bakte.
– Dát dieđusge mearkkaša ollu dan olbmui gii lea vuoitán, ja mun sávvan ollu lihku vuoitái. Lea maiddái earenoamaš illudahti go sihke diibma ja dán jagi leat ollugat Guovdageainnus vuoitán, dadja Johan Vasara.
Son ii loga diehtit iige gullan gii vuoti lea, ja lohka soma go Guovdageainnus dál orrot eanet vuoitit go mat dán radjai leat leamašan Verdal gávpogis Davvi-Trøndelágas.
Nordlándii golbma vuoittu
Nordlánddas ledje guokte dievddu ja okta nissonolmmoš geat guhtiige juhkkojuvvui badjelaš 1,3 miljovnna ruvnno. Nubbe dievdu guhte lei okta vuitiin, illá gávnnai sániid go speallofitnodat válddii oktavuođa
– Vuoi gáfat, dál gal orruleaman juovlaruohtta! Vuoi, vuoi… maid galggan dadjat? Giitu skeaŋkkas! Na dál gal…
– Dát ii leat duohta! Dát ii leat duohta! leago jur duohta? Nu vástidii Bådåddjo nissonolmmoš go oaččui dieđu vuoittu birra. 1,3 miljovnna ruvdno, orruleamen hui buorre.
Mii leat dása čoahkkanan olles bearaš ja leat dál juovlaskeaŋkkaid rahpamin, muhto gal dát lei hávskes muosehuhttin.
– Mii leat ožžon ollu fiinna skeaŋkkaid, na ja sávan ain buriid juovllaid, dadjala movttegis Bådåddjo nissonolmmoš go oaččui dieđu ahte son lei vuoitán.