Ođđa jođiheaddjit ráhkkanišgoahtán ávvudeapmái

– Márkomeanus lea erenoamáš buorre čáva geat leat bargan dáinna máŋggaid jagiid, ja moai illudetne sakka bargagoahtit singuin. 2019:s ávvuda Márkomeannu 20 jagi - ja mii áigut dieđusge gudnejahttit ávvudeaddji. Justa mo ii muitaluvvo vel gal - muhto sáhkkiivuohta ja hutkás duddjonnákca leat guokte dehálaš čoavddasáni.

Dán dat Stian Pedersen (25) ja Aili Guttorm (27) dadjaba preassadieđáhusas maid Márkomeanu-festivala lea sádden.

Pedersen lea lea virgáduvvon beaivválaš jođiheaddjin ja buvttadeaddjin. Guttorm fas beaivválaš jođiheaddjin bealle virgái.

25-jahkásaš almmái lea Gáivuonas Romssa fylkkas eret. Sus lea oahppu prošeaktajođiheamis dáiddalaš ja hutkás ealáhusain.

Son lea maŋimuš jagiid bargan aktiivvalaččat Riddu Riđus, mas váldodoaibman leamaš buvttadeapmi.

• LOGA: – Vi vil utfordre oss til å tenke hvordan vi skal ha det nå og i fremtiden

– Mearkkašupmi olle Sápmái

– Festivála deavdá 20 boahtte jagi. Dat muitala man dehálaš festivála lea ja makkár mearkkašupmi das lea Sápmái. Mun áiggun bargat dan ala vai Márkomeannu joatká movttiidahttit áŋgiruššat, hirpmahuhttit ja ahte galgá leat deaivvadanbáikin olles Sápmái, dadjá Pedersen.

Aili Guttorm lea Kárášjogas eret, muhto dáid áiggiid lea sus ruoktu Mossas. Son lea oahppan industriála hábmen- ja mašiidnainšenevra.

Son lea válljejuvvon sámediggeáirrasin Lulli-Norgga válgabiirres Norgga Sámiid Riikkasearvvi ovddas.

– Sávan Márkomeannu galgá leat dat báiki gosa olbmot vulget deaivvadit ustibiiguin fas, guldalit musihka, boagustit ja dovdat ilu váimmus, dadjá 27-jahkásaš geas leat máttut sihke Kárášjogas ja Deanus.

Márkomeannu ávvuda 20-jagi ávvudeami 2019:s, ja lágiduvvo suoidnemánu 25.-28. b. 2019:s.

GEAHČA:

Márkomeannu 2018 21 bilder