Roger Ludvigsen álggii nuorran čuojahit Ivnniguin joavkkus, muhto lea daid maŋemus jagiid bargan earret eará Mari Boiniin. Ludvigsen čuojaha ollu iešguđetlágan čuojanasaiguin, muhto dávjjimusat dakkáriiguin main leat streaŋggat.
Roger Ludvigsen lea juste dáid beivviid čuojaheaddji Áillohačča teáhterbihtás "Ridn'oaivi ja nieguid oaidni". Dán bihttái lea válljen čuojanasa man gohčoda World-stick, dahje máilmmi-soabbi. Namma boahtá das go dákkáraš čuojanasat gávdnojit miehtá máilmmi, čilge Ludvigsen. Dása atná son vel seammalágan dávggi go dan maid atná fidjol-čuojaheapmái.
Gula world-stick jiena dás:
Kenneth Ekornes lea eret Sykkylvenis Møre ja Romsdal filkkas, muhto lea guhká juo bargan sámi musihkkamáilmmis. Son lea čuojahan ovttas Iŋgor Ántte Áilluin, Inga Juusoin ja Mari Boiniin.
Ekornes muitala iežas jearahit man birra luođit ja lávlagat leat, ja de geahččala gávdnat čuojanasaid mat heivejit earenoamáš bures juste daid luđiide dahje lávlagiidda. Earret eará leat sus goikaduvvon beaivelottáža moniid olggožat, mat ráhkadit jiena mii muittuha čázi golgama.
Gula dáid čuojanasaid jiena dás;