NRK Meny
Normal

Ođđa giellagáibádus Guovdageainnu suohkanis

Jus deike áiggožat bargui, de gal biddjot sámegielohppui, jus it hálddaš sámegiela.

Kautokeino - Guovdageaidnu

Guovdageaidnu galgá leat ofelažžan eará suohkaniiide, oaivvildit suohkana njunnožat.

Foto: Dan Robert Larsen / NRK

Dán gáibádusa sáhttá dál Guovdageainnu suohkan bidjat go almmuhit ođđa virggiid, namalassii ahte ohcci guhte ii hálddaš sámegiela galgá leat mielas oahppat dán giellakurssaid bokte.

– Mii leat oaidnán dása dárbbu, ja lea guhká leamaš sáhka suohkanis, guđe láhkai mii galgat dán oažžut sadjái vai boahtteáiggis beasašeimmet vel eambbo geavahit sámegiela, muitala sátnejođiheaddji Johan Vasara.

Áigi lasihit giellagáibádusa

Suohkanis leat 1985 rájes leamaš njeallje giellagáibádusa, main ovtta galget válljet go almmuhit virggiid.

Otná rájes lea suohkanis vel stuorát válljenmunni, go viđat molssaeavttu mearridedje.

«Ohccit geat eai máhte sámegiela galget leat mielas čađahit sámegieloahpahusa maŋŋá virgádeami.»

Gáibádus lei sáhttit leat vel bastileabbo

Ráđđeolmmái Kent Valio dat ovddidii suohkanstivrii dan ođđa eavttu ja oaččuige rámi suohkanstivrra áirasiin go lea duostilit ovddidan giellaeavttu.

Dát evttohus, mii ovdagottis rievdaduvvui, lei sáhttit leat vel bastilebbo go dan maid suohkanstivra odne mearridii.

«Ohccis ferte sámegielmáhttu mii vástida virggi vuordámušaide, dahje leat mielas čađahit sámegieloahpahusa virgáibidjama maŋŋel.»

(Artihkkal joatká gova vulobealde)

Ráđđealmmái Kent Valio ovdánbuktá evttohusa

Kent Valio otná čoahkkimis.

Foto: Johan Ante Utsi / NRK

Dán rievdadusa, nammalassii váldit eret ahte ohccis ferte leat sámegielmáhttu, manai earret eará suohkanstivrra áirras Klemet Erland Hætta vuostá.

– Mii galggašeimmet baicca duostat čađahit dán giellapolitihka nu go leimmet áigon. Guovdageainnu suohkan lea ja galgá leat sámi ofelažžan, ja mii berrešeimmet de duostat dahkat dakkár mearrádusaid maidda muhtomat eai dáidde liikot.

Makkár de galgá gielladássi?

Mo dát giellaoahpahusat galget čađahuvvot ii dieđe vel sátnejođiheaddji muitalit.

Johan Vasara

Johan Vasara lea sátnejođiheaddji Guovdageainnu suohkanis.

Foto: Marie Elise Nystad

– Dát eai leat vel válbmasat, muhto dáinna lágiin mii goit čájehit ahte mii váldit ovddasvástádusa maiddái dán áššis, ja leat ofelaččat Sámis.

– Ja makkár gielladási mii vuordit iežamet bargiiguin lea maiddái virggis gitta. Jus lea dakkár virgi mas lea olu mánáiguin ja boarrásiiguin dahkamuš, de lea lunddolaš vuordit ahte giellagelbbolašvuohta lea guovddážis. Jus lea dakkár virgi gos ii leat nu olu oktavuođas olbmuiguin, baicce jápma biergasiiguin, de ii soaitta dát gáibádus seamma dárbbašlaš, loahpaha Vasara.