Ođđa dihtorprográmma galgá du veahkehit lohkat sámegiela

Máilmmi vuosttaš hállanprográmma eamiálbmotgillii almmuhuvvui ikte Sámedikkis Kárášjogas.

Aili Keskitalo

Sámediggepresideanta Aili Keskitalo (NSR) lei sihke movtta ja rámis go ikte beasai almmuhit ođđa dihtorprográmma.

Foto: Berit Solveig Gaup / NRK

Davvisámegillii galgá dál sáhttit dáinna dihtorprográmmain dál bidjat lohkat teavsttaid.

Dát galgá ávkin sidjiide geain leat lohkanváttisvuođat ja sidjiide geat leat oahppamin davvisámegiela.

Sámediggepresideanta Aili Keskitalo dat almmuhii dán ođđa veahkkeneavvu davvisámegielas.

Presideanta rámis

Sámediggi ovttas Acapela Group AB, Divvun ja Giellateknoin Romssa Universitehtas dat leat hállansyntesa ovddidan davvisámegillii.

Ikte almmuhandilálašvuođain lei sámediggepresideanta Aili Keskitalo rámis go beasai almmuhit dán veahkkeneavvu davvisámegillii.

Hállansyntesa lea namma dan sierralágan dihtorprográmmas, mii sáhttá ráhkadit teavstta olbmo jietnan.

Sámedikkis čilgejit ahte prográmma sáhttá lohkat teavstta. Jietna mii geavahuvvo lea juogo goansta dehe olbmojietnan dahkkon.

Davvisámegiela hállannsyntesas sáhttá dál gullat Elle ja Biera jienaid. Dáid jienaid duogábealde leaba Laila Susanne Sara Oskarsson ja Johan Máhtte Skum.

Susann Magnusson Acapela Group ABs lohká ahte son sávvá dán buorre veahkkeneavvun sidjide geat galget oahppat sámegiela ja sii geain leat lohkanváttisvuođat.

Sávvá ollugat váldet atnui veahkkeneavvu

Sámediggepresideanta sávvá ge ahte ollugat váldet atnui dán ođđa reaiddu:

Vaikko dál lea dát fálaldat davvisámegillii, de ii boađe dát vel julev- ja lullisámegillii lagamus áiggis.

Sámegielas leat čohkken ollu teavsttaid maid leat coggan dán dihtorvuorkái ja dát fas leat ávkin dán lohkansyntesa prográmmas.

Sjur Moshagen Divvun prošeavtta jođiheaddji muitala ahte davvisámegielas leat 20 miljon sáni, muhto julev- ja lullisámegielas eai leat go birrasiid miljon sáni goappá ge gielas.

Danne ádjána sullii logi jagi ovdalgo dát seammá prográmma lea gárvvis julev- ja davvisámegielaide.