Olbmot earáhuhttet luopmoplánaid

Njealjis juohke guđát olbmos earáhuhttet geasseluomu dán jagi. Nu čájehit Europeiske mátkedáhkádusa logut. Olusat jogo eai váldde luomu dahje áigot earáláhkai luomostallat go álggos ledje áigon.

Sivva lea geanohis kruvdna ja alla inflašuvdna.

Seammás áigot dat geat vulget olgoriikii, luomostallat riikkain mat eai gula eurosonii ja gos norgga kruvdna de lea nannosat.

Nuorat leat eanemus gergosat luomostallat riikkain gos Euro ii adno, nu go Bulgarias ja Albanias.

Sámediggi hilggui jienasteaddjiid - hálddahusriekti dohkkehii mearrádusa

Alimus hálddahusriekti ii áiggo dutkat váidaga mii lei boahtán Suoma sámedikki jienastuslohkui dieđiheames.

Sámedikki válgalávdegoddi ii lean dohkkehan buohkaid jienastuslohkui, geaid Alimus hálddahusriekti ovddit válggain lei dohkkehan dohko. Hálddahusriekti mearridii ahte ii dutkka váidaga go dás ii lean sáhka iešnjulgemis mas divvot boasttuvuođaid.

Nu bissu Suoma sámedikki mearrádus.

Arvvit duššadan Haitis

Unnimusat 15 olbmo leat duššan Haitis garra arvviid geažil. Arvvit leat dagahan garra dulvviid ja eanafierramiid.

13000 olbmo leat šaddan guođđit ruovttuideaset ja masá 7500 viesu leat billašuvvan. Garra arvvesdálki lea maid bilidan gilvvagárddiid ja bealdduid.

Stáhtaministtar Ariel Henry lohká dál oččodeamen bákkálaš ja riikkaidgaskasaš organisašuvnnaid veahkehit daid geat leat fáhtehallan dán katastrofii, čállá NTB