Stuorradiggi lea oastán Britta Marakatt-Labba dáidaga
Odne almmuhuvvui vuosttaš sámi dáidda Stuorradikkis. Govvadáidda lea seainnis olggobealde Stuorradikki váldo čoahkkinlanja, namalassii dan stuorra lanjas mii dárogillii gohčoduvvo Vandrehallen. Govva maid Britta Marakatt-Labba lea ráhkadan Stuorradiggái, gohčoduvvo «Lodderáidalas», dárogillii Melkeveien.
– Fitnen dáppe máŋga logi jagi áigi, in mun goassege máhttán niegaditge ahte boahtá beaivi go mu bargu boahtá dáppe heaŋgat, dadjá Marakatt-Labba.
Marakatt-Labba čilge ahte su mielas lea govva politihkalaš muittuhus. Ovdamearka dihte bieggamillot Fovsen-Njaarkes, ruvkedoaimmat Riehpovuonas ja maiddái ođđa áigi Sámis gos dáiddár lea hábmen golbma sámi ipmila mat vudjet skohteriin.
Stuorradiggepresideanta Masud Gharahkhani lohká iežas leamen rámis go sámi dáidda viimmat lea ožžon saji ná oidnosii.
– Lea oassi sámi kultuvrras, historjjás ja identitehtas mat dál bohtet ovdán ja čalmmustahttojit Stuorradikkis.
