Sámi joatkkaskuvla Winhec-miellahttu
Sámi joatkkaskuvla Kárášjogas lea dohkkehuvvon miellahttun Máilmme eamiálbmogiid alitoahpu ovttasbargui (The World Indigenous Nations Higher Education Consortium - WINHEC).
Nammadeapmi almmuhuvvui Winhec konferánssas Cloqueta gávppogis USA oassestáhtas Minnesotas.
Siiddaeamit (rektor) cealká ahte buohkat leat dieđusge áibbas erenoamáš ilolaččat go dál leat dohkkehuvvon Winhec-miellahttun. Miellahttuvuohta lea earenoamáš dehálaš eamiálbmotgeahččansajis, go dat rahpá uvssaid ja nanne ovttasbarggu eamiálbmotskuvllaiguin ja Winheciin, čállá skuvla iežaset neahttasiidduin.
Sámi joatkkaskuvla Kárášjogas ozai miellahttuvuođa 2018.