Sáhttiba lihcohallat bellodagas
Guovddášbellodaga sámediggeáirasat Elisabeth Erke ja Hans Ole Eira sáhttiba lihcohallat bellodagas, dieđiha Ságat. Bellodaga sámepolitihkalaš ráđđi Gáisi válgabires dat oččodišgoahtá sudno eret Guovddášbellodagas.
Ášši vuolgá das go Hans Ole Eira válljejuvvui sámediggeráđđái, vaikko Guovddášbellodaga sámepolitihkalaš ráđđi lei mearridan Svein Oddvar Leirosa ráđđái. Dán eaba doahttalan áirrasguovttos Hans Ole Eira ii ge Elisabeth Erke.
Gáisi válgabire Guovddášbellodaga sámepolitihkalaš ráđi jođiheaddji, Frank Valø, lohká dál iežaset váldit oktavuođa Guovddášbellodaga váldočálliin gii de mearrida maid barget. Les på norsk.