Preassadieđáhus boktá eanet riiddu

Preassadieđáhus maid Guovddášbellodaga parlamentáralaš jođiheaddji Sámedikkis, Elisabeth Erke ja bellodaga Sámepolitihkalaš ráđi njunuš, Svein Leiros, leaba sádden, orru bulleheamen vel eanet riiddu bellodagas.

Soai čálliba oanehis preassadieđáhusas otne ahte eaba áiggo bellodaga siskkáldas áššiid digaštallat mediain.

Eaba ge dohkket ahte bellodaga miellahtut fallehit sámediggepresideantta dan riiddus mii lea čuožžilan maŋŋá sámediggeráđi nammadeami.

Preassadieđáhus lea sakka eaddudan Gáisi válgabire Guovddášbellodaga sámepolitihkalaš ráđi jođiheaddji, Frank Valø.

– Dieinna čállosiin orrot njuolgut gáržžideamen min cealkinvuoigatvuođa, ja geahččalit jávohuhttit min earáid geat maid leat válljejuvvon sierranas doaimmaide bellodagas, lohká Valø.

Riidu lea vuolgán das go Hans Ole Eira válljejuvvui sámediggeráđđái, vaikko Guovddášbellodaga sámepolitihkalaš ráđđi lei mearridan Svein Oddvar Leirosa ráđđái. Dán eaba doahttalan bellodaga áirrasguovttus Hans Ole Eira ja Elisabeth Erke.

Das maŋŋá lea ge Valø ja bellodaga sámepolitihkalaš ráđđi Gáisi válgabires oččodišgoahtá Eira ja Erke eret Guovddášbellodagas. Valø lea maid cealkán ahte sámediggepresideanta, Silje Karine Muotka lea dagahan iežas ovdii go Eira válddii mielde ráđđái.

Valø ain deattuha ahte su báikkálaš searvi Romssas ii leat vuollánan dán áššis, ja ahte sii ain gáibidit ahte Erke ja Eira galgaba lihcohallat Guovddášbellodagas.