Hopp til innhold

OED: – Fovsen-duomu ádjána guorahallat

Fovsen bieggarusttetášši ferte vuđolaččat čielggadit gávnnahan dihte mo Alimusrievtti duomu galgá čuovvulit, cealká oljo-ja energiijaministtar Marte Mjøs Persen preassadieđáhusas.

– Duopmu ii mielddisbuvtte ahte bieggafápmorusttegiid huksenlohpi máhcahuvvo ja huksenlobiid nuppásteapmi eaktuda ođđa hálddahuslaš mearrádusaid, cealká Mjøs Persen.

Son lea čállán reivve Sámediggái, boazodolliide ja bieggarusttegiid huksejeddjiide.

– Departemeanta ii leat mearridan besset go bieggarusttegat orrut nu go dál leat, vai gaikot go buot dahje oasi dain, deattuha maid Mjøs Persen.

Sámediggepresideanta Silje Karine Muotka ádde ahte stáhta ferte suokkardit duomu váikkuhusaid, muhto son ain gáibida ahte bieggarusttegiid doaibma bissehuvvo dan botta go guorahallet ášši.

Son maid ain gáibida ahte stáhta átnu Fovsen njaarke boazodolliin ándagassii, go olmmošvuoigatvuođat leat rihkkojuvvon.

Duorastaga deaivvada Sámediggi oljoministariin Oslos.

Marte Mjøs Persen
Foto: Christine Fagerbakke / Christine Fagerbakke