Kaski(SV): – Sámedikki ferte nannet
– Sii vuoruhit lasi ruđaid Sámediggái ja sámi doaimmaide go dás lea sáhka demokratiija nannemis ge, lohká Sosialisttalaš gurutbellodaga (SG) ruhtaáššiid ovddasvástideaddji ja stuorradiggeáirras Kari Elisabeth Kaski.
Son muittuha ahte Sámediggi lea olu jagiid gillán heajos ekonomiijain.
SG evttoha sámi doaimmaide 52,5 miljovnna ruvnnu lasáhusa. Dát boađášii lassin dasa maid ovddit ráđđehus evttohii. SG lasáhusas leat Sámediggái várren 10 miljovnna ruvnnu lasi. 30 miljovnna ruvnnu lasi evttohit sámi dearvvašvuođadutkamii.
– Dán suorggis leat olu hástalusat mat eaktudit erenoamáš doaibmabijuid, lohká Kaski.
Bargiidbellodat, Guovddášbellodat ja Sosialisttalaš gurutbellodat šiehtadallagohte otne boahtte jagi bušeahtta áššiin. Les også på norsk her.
