Cuiggoda Máilmmi meašttirčiekčamiid

Romssa valáštallansearvi, TIL, áigu joatkit cuiggodit dievdduid Máilmmi meašttirčiekčamiid mat lágiduvvojit Qataras boahtte jagi. TIL áigu ovttas Amnesty Internationalain álggahit kampánnja, man mihttu lea čalmmustahttit olmmošvuoigatvuođaid, go boahtte jagi lágidit čiekčamiid. TIL áigu dán jagi maŋemus čiekčamis atnit báiddi mas lea QR-koda. Ulbmil dainna lea go čikčiin váldá gova, de boahtá liŋká kampánnjasiidui mii čalmmustahttá daid hejos beliid Máilmmimeašttirčiekčamiin.