Árvala 52,5 mill. sámi doaimmaide

Sosialisttalaš Gurutbellodat árvala iežaset alternatiiva stádabušeahttaárvalusas 52,5 miljovnna ruvnno eambbo sámi doaimmaide, go dan maid Solberg-ráđđehus lei árvalan. Sámediggái árvalit 10 miljovnna ruvnno lassáneami. SG bellodat árvala maiddái 5 miljovnna Internašunála Sámi Filbmainstituhttii, ja vel 6,5 miljovnna preassadoarjaga sámi áviissaide. Bellodat árvala 30 miljovnna ruvnno Saminorii, mii lea stuora álbmotvuođđuduvvan iskkadeapmi, ja dan doaimmaha Sámi dearvvašvuođadutkama Guovddáš, UiT. Dasa lassin áigu bellodat juolludit ovtta miljovnna ruvnno, Plaassje álbmotallaskuvlii, gos áigot návccaid bidjat sámevuhtii. Solberg-ráđđehus árvalii lasi doarjaga Sámediggái 13,3 miljovnna, dál áigu Sosialisttalaš Gurutbellodat vel dan lasihit 10 miljovnna ruvnnain.