Brasilas fertejit ođđasit jienastit

Lulli-Amerihkás Brasilias ii oktage presideanttaevttohasain ožžon badjel beali jienain ja danne fertejit jienasteaddjit jienastit ođđasit dán mánu loahpas. Dan dieđihit Brasilia válgaeiseválddit, nu čállá ođasdoaimmahus Reuters. Brasilia stuorámus TV-kanála Globo dieđiha ahte riika ovddeš presideanta Lula da Silva oaččui 48.2% jienain, presideanta Jair Bolsonaro 43.4% ja dalle ledje 99% jienain lohkkon. Ođđa jienasteapmi lea golggotmánu 30. beaivve.