Sáhttet fáhkka giddet rájá Ruššii

Ruošša mobiliseren ja sin vejolaš gielddus luoitit ruoššaid guođđit riikka, sáhttá lasihit lobihis rádjarasttildemiid norgga-ruošša rájá badjel Stuoravuovddis Mátta-Várjjagis.

Nu čállá justiisa- ja gearggusvuođadepartemeanta preassadieđáhusas.

Bearjadaga biddjo Finnmárkku politiijaguvlui politiijahelikopter mas leat sensorat, lasihan dihtii kapasitehta oaidnit vejolaš lobihis rádjárasttildemiid.

– Mii giddet rájá jođánit jus orro dárbu, ja rievdadusat sáhttet boahtit fáhkka. Norgii leat unnánat boahtán Suoma ektui, ja dilli lea eará ládje dáppe, dadjá justiisa- ja gearggusvuođaministtar Emilie Enger Mehl.

Norgga ja Ruošša rádjá lea 198 kilomehter guhki, eanaš Báhčaveaijoga mielde.