Stuorravuovdde johtolat fas lassánan
Ruošša beale johtolat Norgga beallái, Stuorravuovdde bokte, lea fas lassánan duorastaga iđida.
Gaskavahku dieđihedje politiijat ahte johtolat Ruošša bealde Norgga beallái lei jaskkodan. Muhto go rádjá rahpasii iđđes dii. 8:is, de bohte 6-7 ruošša biilla diimmu siskkobealde rájá badjel.
Ruošša beale bealátkeahtes mediat leat čállán ahte jáhkket Kreml boahtá giddet rájáid almmáiolbmuide mobiliserenagis.