– Norgga gássa dáidá leat stuorámus saboterenmihttu
– Norgga gássa dáidá leat stuorámus saboterenmihttu olles Eurohpás dál.
Nu dadjá Suodjalusa allaskuvlla dutki, Geir Hågen Karlsen. Gássabohccit Nord Stream 1 ja 2 leaba suođđan. Bornholm sullo olggobealde Nuortamearas galgá leat bávkkehan guktii, láhka dáid gássabohcciid.
Karlsen dadjá ahte dákkár sabotáša sáhttá dáhkkot sihke buokčaleddjiin, čázevulošfatnasiin, vuojániin main ii leat vuoddji dahje neahttafallehemiin rusttegiid vuostá mat leat nannámis.
– Ráđđehus váldá dili hui duođalaččat, dadjá justiisaministtar Emilie Enger Mehl. Mehl dadjá ahte ii mihkkege čujut dan guvlui ahte seamma soaitá geavvat Norgii juste dál. PST, e-bálvalusat ja Našuvnnalaš sihkarvuođaeiseválddi leat nannejuvvon, muitala son.
